«اقكەربەز لايىق بولماۋى مۇمكىن»: بايان ماقساتقىزى «قازاق ارۋىنا» قاتىستى كۇتپەگەن مالىمدەمە جاسادى

فوتو: جەكە پاراقشالارىنان

تانىمال پروديۋسەر بايان ماقساتقىزى “قازاق ارۋىنا” قاتىستى تىڭ دەرەكتى ءبولىستى. بۇل تۋرالى qandastar.kz Stan.kzاقپارات اگەنتتىگىنە سىلتەمە جاساپ حابارلايدى.

ايتا كەتەيىك, پروديۋسەر بايقاۋداعى داۋىس بەرۋ جۇيەسى ىستەن شىققانىن مويىندادى.

ول پروۆايدەرلەردىڭ جارتى ميلليونعا جۋىق داۋىس بەرۋشىلەردى كوتەرە الماي, Telegram بوتىنىڭ داۋىستى قابىلداماي قالعانىن ايتتى. سول سەبەپتى دە «قازاق ارۋى-2024» بايقاۋىنىڭ جەڭىمپازى قايتادان انىقتالاتىن كورىنەدى.

«قازاق ارۋى» بايقاۋىنا قاتىستى ۇلكەن حابارلاما جاساعىم كەلىپ تۇر. ءبىزدىڭ پروۆايدەرلەر ارتىلعان جۇكتى كوتەرە المادى. بۇل ءبىزدىڭ كىنامىز ەمەس. تەلەگرام ارنا بارلىق داۋىس بەرۋشىلەردى كوتەرە المادى. جارتى ميلليونعا جۋىق ادام داۋىس بەرگىسى كەلگەن ەكەن. بۇل بايقاۋدىڭ ۇلكەن تانىمالدىلىققا يە ەكەنىن بىلدىرەدى. ۇيىمداستىرۋشى رەتىندە پروۆايدەرلەردىڭ كىناسىن موينىمىزعا الىپ, ەرتەڭگى تەلەارناعا شىعاتىن ەفيردە داۋىس بەرۋدى قايتا جاساعىمىز كەلىپ وتىر», – دەدى جوبا جەتەكشىسى.

ونىڭ سوزىنشە, ەفير قالاي جازىلدى سول كۇيىندە بەرىلەدى. تەك داۋىس بەرۋ ءۇشىن 2,5 ساعات بەرىلىپ, سىلتەمە جاڭارتىلادى. تەلەكورەرمەن تىكەلەي ەفير بارىسىندا قايتادان داۋىس بەرە الادى.

«تاريحتا ءبىرىنشى رەت قايتادان داۋىس بەرۋ بولايىن دەپ تۇر. ءبىز قاشان دا ادىلدىك ءۇشىن شىرىلدايمىز. بۇل اتاققا قايتادان اقكەربەز لايىق بولۋى مۇمكىن نەمەسە اقكەربەز بولماۋى دا مۇمكىن. ءبارى حالىقتىڭ ەنشىسىندە», – دەدى بايان ماقساتقىزى.

ەسكە سالايىق, «قازاق ارۋى-2024» بايقاۋىنىڭ جەڭىمپازى قىزىلوردالىق ارۋ اقكەربەز ىسقاققىزى اتانعان ەدى.

• الايدا قاتىسۋشىلارعا داۋىس بەرۋ كەزىندە تەحنيكالىق اقاۋلار تۋىنداپ, كوپشىلىك ءوز تاڭداۋلارىن جاساي الماعاندارىنا نارازىلىعىن بىلدىرگەن.