جاڭالىقتار
اقمولا وبلىسىندا ايەلدى 4 ساعاتقا سۇرانىپ كەتكەنى ءۇشىن جۇمىستان شىعارىپ جىبەرگەن
فوتو: depositphotos.com
اقمولا وبلىسىندا زاڭسىز جۇمىستان شىعارىلعان كوپ بالالى انا جۇمىسقا قايتا الىندى. بۇل تۋرالى qandastar.kz Stan.kzاقپارات اگەنتتىگىنە سىلتەمە جاساپ حابارلايدى.
اقمولا وبلىستىق سوتىنىڭ ازاماتتىق ىستەر القاسى كوپبالالى انانىڭ جشس باسشىلىعىنىڭ جۇمىستان بوساتۋ تۋرالى بۇيرىعىن جارامسىز دەپ تانۋ تۋرالى تالاپ ارىزى بويىنشا ازاماتتىق ءىسىن قارادى.
سوتتىڭ مالىمەتىنشە, كوپ بالالى ايەل 2023 جىلدىڭ قىركۇيەگىنەن باستاپ دۇكەندە كاسسير بولىپ جۇمىس ىستەگەن. 2024 جىلدىڭ 4 ناۋرىزىندا ول ديرەكتوردان سۇرانىپ, ءتورت ساعات جۇمىس ورنىندا بولماعان, ونىڭ ورنىنا ارىپتەسى جۇمىس ىستەي تۇرعان.
«بىراق دۇكەن ديرەكتورى ا-نىڭ جۇمىستا بولماعانى تۋرالى اكت جاساپ, تۇسىنىكتەمە جازىدىرىپ, جۇمىستان شىعارۋ تۋرالى شەشىم شىعارعان. سوت ا-نىڭ جۇمىستان بوساتىلۋىن زاڭسىز دەپ تاپتى. جۇمىستان بوساتۋ تۇرىندەگى تارتىپتىك جازاعا نەگىز جوق. كۋاگەرلەر مەن دۇكەن قىزمەتكەرلەرى ا-نىڭ دۇكەن ديرەكتورىنان دەمالىس سۇراعانىن راستادى. تارتىپتىك جازا قولدانۋ ءتارتىبى بۇزىلعان, بۇيرىقتا جۇمىستان بوساتۋدىڭ نەگىزى كورسەتىلمەگەن», – دەلىنگەن سوت حابارلاماسىندا.
سوت كوپ بالالى ايەلدىڭ تالاپ ارىزىن قاناعاتتاندىرىپ, جۇمىستان بوساتۋ تۋرالى بۇيرىق جارامسىز دەپ تانىلدى. ايەل بۇرىنعى قىزمەتىنە قايتا ورالدى.
«ا-نىڭ پايداسىنا جشس-نەن 895 520 تەڭگە كولەمىندە ەڭبەكاقى ءوندىرىلدى. سوت القاسىنىڭ قاۋلىسىمەن سوت شەشىمى وزگەرىسسىز قالدىرىلدى. جۇمىسىن قالپىنا كەلتىرۋ جانە جالاقى تولەۋ تۋرالى شەشىم دەرەۋ ورىندالۋى قاجەت», – دەلىنگەن حابارلامادا.
