Aqmola oblysynda áıeldi 4 saǵatqa suranyp ketkeni úshin jumystan shyǵaryp jibergen

Foto: depositphotos.com

Aqmola oblysynda zańsyz jumystan shyǵarylǵan kóp balaly ana jumysqa qaıta alyndy. Bul týraly qandastar.kz Stan.kzaqparat agenttigine silteme jasap habarlaıdy.

Aqmola oblystyq sotynyń azamattyq ister alqasy kópbalaly ananyń JShS basshylyǵynyń jumystan bosatý týraly buıryǵyn jaramsyz dep taný týraly talap aryzy boıynsha azamattyq isin qarady.

Sottyń málimetinshe, kóp balaly áıel 2023 jyldyń qyrkúıeginen bastap dúkende kassır bolyp jumys istegen. 2024 jyldyń 4 naýryzynda ol dırektordan suranyp, tórt saǵat jumys ornynda bolmaǵan, onyń ornyna áriptesi jumys isteı turǵan.

«Biraq dúken dırektory A-nyń jumysta bolmaǵany týraly akt jasap, túsinikteme jazydyryp, jumystan shyǵarý týraly sheshim shyǵarǵan. Sot A-nyń jumystan bosatylýyn zańsyz dep tapty. Jumystan bosatý túrindegi tártiptik jazaǵa negiz joq. Kýágerler men dúken qyzmetkerleri A-nyń dúken dırektorynan demalys suraǵanyn rastady. Tártiptik jaza qoldaný tártibi buzylǵan, buıryqta jumystan bosatýdyń negizi kórsetilmegen», – delingen sot habarlamasynda.

Sot kóp balaly áıeldiń talap aryzyn qanaǵattandyryp, jumystan bosatý týraly buıryq jaramsyz dep tanyldy. Áıel burynǵy qyzmetine qaıta oraldy.

«A-nyń paıdasyna JShS-nen 895 520 teńge kóleminde eńbekaqy óndirildi. Sot alqasynyń qaýlysymen sot sheshimi ózgerissiz qaldyryldy. Jumysyn qalpyna keltirý jáne jalaqy tóleý týraly sheshim dereý oryndalýy qajet», – delingen habarlamada.