اقمولا وبلىسىندا بيىل 18 ملن ءتۇپ اعاش ەگىلەدى

وسىلايشا 4  مىڭ گەكتاردان استام ورماندى القاپ كوگالداندىرىلادى. قازىر ايماقتا كوشەت ەگۋ جۇمىستارى باستالدى.

«تازا قازاقستان» اكتسياسى اياسىندا ورمانشىلارعا ستۋدەنتتەر مەن ەرىكتىلەر دە كومەكتەسىپ جاتىر. بۇل وبلىس ورتالىعىنىڭ ىرگەسىندە ورنالاسقان بۇقپا ورمان القابى.

مۇندا قايناعان تىرلىك. ورمانشىلار كۇنىنە شامامەن 5-6 گەكتار القاپقا كوشەت ەگەدى. ال بۇگىن ولارعا كومەككە 50-گە تارتا ەرىكتى مەن ستۋدەنت كەلدى. داستان ەرمەكوۆ, وبلىستىق جاستار رەسۋرستىق ورتالىعىنىڭ باسشىسى: — قازىرگى ۋاقىتتا مەديتسينالىق كوللەدج ستۋدەنتتەرى, شوقان ءۋاليحانوۆ ۋنيۆەرسيتەتىنىڭ ستۋدەنتتەرى بارلىعىمىز شىعىپ, كوشەتتەردى وتىرعىزۋدامىز. بۇل دەگەن كوكشەتاۋ قالامىزدىڭ جان-جاعىنا اعاش وتىرعىزىپ, ەكولوگياعا ءوزىمىزدىڭ پايدامىزدى تيگىزەمىز دەگەن ويدامىن. بەكسۇلتان ساتقانباەۆ, ستۋدەنت: — قازىرگى ۋاقىتتا تابيعاتتى قورعاۋدى قولعا الۋ كەرەك. ەكولوگيانى جاقسارتۋ كەرەك. اعاش وتتەگى بەرەدى دەيدى عوي. سوندىقتان اعاش وتىرعىزۋمەن اينالىسۋ كەرەك ستۋدەنتتەر دەپ ويلايمىن. وسىنداي جۇمىستارمەن بەلسەندى اينالىسامىز. مەملەكەت باسشىسى 2020 جىلعى جولداۋىندا الداعى 5 جىلدا ەلىمىزدە 2 ملرد كوشەت وتىرعىزۋدى تاپسىردى.

بۇل مەجەگە جەتۋ ءۇشىن اقمولالىق ورمانشىلارعا 225 ملن دانا اعاش ەگۋ جۇكتەلگەن. پرەزيدەنت پارمەنىنە سايكەس جەرگىلىكتى سالا ماماندارى جىلداعى جوسپاردى ورىنداپ كەلەدى. ءتىپتى, بىلتىر بەلگىلەنگەن مەجەدەن دە اسىپ تۇسكەنىن ايتادى. بولات توكىشەۆ, وبلىستىق تابيعي رەسۋرستار جانە تابيعاتتى پايدالانۋ باسقارماسى باسشىسىنىڭ ورىنباسارى: — اقمولا وبلىسىنىڭ لەسحوزدارى 2023 جىلى 2410 گەكتارعا اعاش وتىرعىزدى. 12 ميلليوننان 70 مىڭ استام اعاش انا جىلى ەگىلدى. پلاندى 105 پايىزعا كوپ جاسادىق. جالپى جاپپاي تال ەگۋ ناۋقانى ايماقتا مامىر ايىنىڭ سوڭىنا دەيىن جالعاسادى. «تازا قازاقستان» اكتسياسى اياسىندا بەلسەندى جاستار تەك كوشەت ەگۋ شاراسىنا عانا ەمەس, ونى كۇتىپ, سۋارۋعا دا اتسالىسادى.