جاڭالىقتار
اقمولا وبلىسىندا ەكى اكىمگە قاتاڭ سوگىس جاريالاندى
فوتو: اشىق دەرەككوز
ەرەيمەنتاۋ جانە جارقايىڭ اۋداندارىنىڭ اكىمدەرى نۇرلان مۇقاتوۆ پەن جانبولات حاميتوۆقا قاتاڭ سوگىس جاريالاندى. بۇل تۋرالى Skifnews.kz اقپارات پورتالى اقمولا وبلىسى اكىمدىگىنىڭ 2024 جىلعى 23 شىلدەدەگى حابارلاماسىنا سىلتەمە جاساپ حابارلايدى.
جارقايىڭ اۋدانىنىڭ اكىمى جانبولات حاميتوۆكە اقمولا وبلىسىنىڭ اكىمى مارات احمەتجانوۆتىڭ سۋ تاسقىنىنىڭ سالدارىن جويۋ جونىندەگى بىرقاتار تاپسىرمالارىن تيىسىنشە ورىنداماعانى ءۇشىن قاتاڭ سوگىس جاريالاندى.
جارقايىڭ اۋدانىنىڭ اكىمدىگى بەلگىلەنگەن مەرزىمدە پاتەرلەر مەن ۇيلەر ساتىپ الۋ, سونداي-اق سۋ تاسقىنىنان كەلتىرىلگەن م ۇلىكتىك زيان ءۇشىن وتەماقى تولەۋ جونىندەگى جۇمىستاردى ۇيىمداستىرۋدى اياقتامادى, تۇرعىن ۇيگە قۇقىق بەلگىلەيتىن قۇجاتتاردى ۋاقىتىندا قالپىنا كەلتىرۋ مەن راسىمدەۋدى قامتاماسىز ەتپەدى, سونىڭ سالدارىنان زارداپ شەككەن وتباسىلارعا ءۇي ساتىپ الۋ مەرزىمدەرى وزگەردى. حالىقپەن جۇرگىزىلەتىن الدىن الۋ جۇمىسىنىڭ وسالدىعى تۇرعىنداردىڭ نارازىلىعىنا اكەلدى.
وبلىس اكىمىنىڭ وكىمىمەن جانبولات حاميتوۆ تارتىپتىك جازاعا تارتىلدى.
«ەرەيمەنتاۋ اۋدانىنىڭ اكىمى نۇرلان مۇقاتوۆقا قوقىس شىعارۋ بويىنشا جۇمىستىڭ ءتيىستى دەڭگەيىندە جۇرگىزىلمەگەنى ءۇشىن قاتاڭ سوگىس جاريالاندى», – دەپ حابارلايدى اقمولا وبلىسى اكىمدىگىنىڭ ءباسپاسوز قىزمەتى.
اۋدان ورتالىعىنىڭ كوشەلەرىندە ەگەۋقۇيرىقتار مەن انتيسانيتاريانىڭ ورىن الۋىمەن جاعداي ۋشىعىپ كەتتى. سونىمەن قاتار, اقمولا وبلىسىنىڭ اكىمى مارات احمەتجانوۆتىڭ اۋداندى اباتتاندىرۋ جونىندەگى تىكەلەي تاپسىرماسىنا دا, باق پەن الەۋمەتتىك جەلىلەردەگى بىرقاتار جاريالانىمداردان كەيىن دە اۋدان اكىمدىگى تاراپىنان ءتيىستى نازار اۋدارىلمادى.
وبلىس اكىمىنىڭ وكىمىمەن نۇرلان مۇقاتوۆقا تارتىپتىك جازا قولدانىلدى.
2024 جىلدىڭ مامىر ايىندا بۋراباي اۋىلىنىڭ اكىمى سابىر جالمۇقانوۆتىڭ ادەپ كودەكسىن بۇزعانى ءۇشىن قاتاڭ تارتىپتىك جازاعا تارتىلعانى حابارلانعان بولاتىن.
