Aqmola oblysynda eki ákimge qatań sógis jarııalandy

Foto: ashyq derekkóz

Ereımentaý jáne Jarqaıyń aýdandarynyń ákimderi Nurlan Muqatov pen Janbolat Hamıtovqa qatań sógis jarııalandy. Bul týraly Skifnews.kz aqparat portaly Aqmola oblysy ákimdiginiń 2024 jylǵy 23 shildedegi habarlamasyna silteme jasap habarlaıdy.

Jarqaıyń aýdanynyń ákimi Janbolat Hamıtovke Aqmola oblysynyń ákimi Marat Ahmetjanovtyń sý tasqynynyń saldaryn joıý jónindegi birqatar tapsyrmalaryn tıisinshe oryndamaǵany úshin qatań sógis jarııalandy.

Jarqaıyń aýdanynyń ákimdigi belgilengen merzimde páterler men úıler satyp alý, sondaı-aq sý tasqynynan keltirilgen múliktik zııan úshin ótemaqy tóleý jónindegi jumystardy uıymdastyrýdy aıaqtamady, turǵyn úıge quqyq belgileıtin qujattardy ýaqytynda qalpyna keltirý men rásimdeýdi qamtamasyz etpedi, sonyń saldarynan zardap shekken otbasylarǵa úı satyp alý merzimderi ózgerdi. Halyqpen júrgiziletin aldyn alý jumysynyń osaldyǵy turǵyndardyń narazylyǵyna ákeldi.

Oblys ákiminiń ókimimen Janbolat Hamıtov tártiptik jazaǵa tartyldy.

«Ereımentaý aýdanynyń ákimi Nurlan Muqatovqa qoqys shyǵarý boıynsha jumystyń tıisti deńgeıinde júrgizilmegeni úshin qatań sógis jarııalandy», – dep habarlaıdy Aqmola oblysy ákimdiginiń baspasóz qyzmeti.

Aýdan ortalyǵynyń kóshelerinde egeýquıryqtar men antısanıtarııanyń oryn alýymen jaǵdaı ýshyǵyp ketti. Sonymen qatar, Aqmola oblysynyń ákimi Marat Ahmetjanovtyń aýdandy abattandyrý jónindegi tikeleı tapsyrmasyna da, BAQ pen áleýmettik jelilerdegi birqatar jarııalanymdardan keıin de aýdan ákimdigi tarapynan tıisti nazar aýdarylmady.

Oblys ákiminiń ókimimen Nurlan Muqatovqa tártiptik jaza qoldanyldy.

2024 jyldyń mamyr aıynda Býrabaı aýylynyń ákimi Sabyr Jalmuqanovtyń Ádep kodeksin buzǵany úshin qatań tártiptik jazaǵa tartylǵany habarlanǵan bolatyn.