اقمولا وبلىسىندا قايتارىلعان اكتيۆ ەسەبىنەن نىساندار سالىنادى

فوتو: اشىق دەرەككوز

اقمولا وبلىسىنىڭ بىرقاتار اۋىلىندا جاڭا فەلدشەرلىك-اكۋشەرلىك پۋنكتتەر (فاپ) مەن دارىگەرلىك امبۋلاتوريالار قۇرىلىسىن اياقتاۋ جۇمىستارىنا ارناۋلى مەملەكەتتىك قوردان 1,7 ملرد تەڭگە ءبولۋ تۋرالى شەشىم قابىلداندى, دەپ جازادى qandastar.kz

«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىندا كوزدەلگەن مەديتسينالىق نىساندار قۇرىلىسى 2024 جىلى باستالدى. اقمولا وبلىسىنىڭ اۋىلدارىندا بارلىعى 4 دارىگەرلىك امبۋلاتوريا, 5 فەلدشەرلىك-اكۋشەرلىك پۋنكت جانە 1 مەديتسينالىق پۋنكت سالىنادى. ءار اۋىسىمدا 405 ناۋقاستى قابىلداي الاتىن دارىگەرلىك نىساندار اۋىلدىق جەرلەردە حالىقتىڭ ساپالى مەديتسينالىق كومەككە قولجەتىمدىلىگىن ەداۋىر جاقسارتۋعا مۇمكىندىك بەرەدى.

دارىگەرلىك امبۋلاتوريالار اقمولا وبلىسىنىڭ كەلەسى اۋىلدارىندا:

• ارشالى اۋدانى ارناساي اۋىلىندا,
• استراحان اۋدانىنداعى ەسكى قالقۇتان اۋىلىندا,
• جارقايىڭ اۋدانى پياتيگورسكوە اۋىلىندا,
• تسەلينوگراد اۋدانى جاڭا ەسىل اۋىلىندا بوي كوتەرەدى.

سونداي-اق:

• جاقسى اۋدانىنىڭ كيروۆ اۋىلىندا,
• تسەلينوگراد اۋدانى جارلىكول اۋىلىندا,
• بۇلاندى اۋدانىنىڭ پارتيزانكا اۋىلىندا,
• بۇلاندى اۋدانى التىندى اۋىلىندا,
• شورتاندى اۋدانىنىڭ پريگورودنوە اۋىلىندا فاپ-تار سالىنادى.

تسەلينوگراد اۋدانىنىڭ شالقار اۋىلىندا مەديتسينالىق پۋنكت پايدالانۋعا بەرىلەدى.