جاڭالىقتار
اقمولا وبلىسىندا كوبەيتۇز كولىن تاعى دا ۆاندالدار ءبۇلدىرىپ جاتىر
فوتو: ۆيدەودان سكرينشوت
اقمولا وبلىسىندا ەلىمىزدىڭ ەڭ كورىكتى ءارى نازىك تابيعي نىساندارىنىڭ ءبىرى — كوبەيتۋز قىزعىلت كولىنە قايتا زيان كەلتىرىلۋدە. استانا قالاسىنان شامامەن 150 شاقىرىم قاشىقتا ورنالاسقان ەرەكشە سۋ ايدىنى تۋريستەردىڭ نەمقۇرايلى ارەكەتتەرىنەن زارداپ شەگىپ وتىر, دەپ حابارلايدى Qandastar.kz
كەيبىر كەلۋشىلەر كول تۇبىنەن قىزعىلت تۇز جيناپ, ونى ينتەرنەت ارقىلى كيلوگراممىن 5 مىڭ تەڭگەگە دەيىن ساتىپ جاتىر. مۇنداي ارەكەتتەر سۋ ايدىنىنىڭ سيرەك كەزدەسەتىن ەكوجۇيەسىنە ەلەۋلى زيان كەلتىرەتىنى ايتىلىپ كەلەدى.
قازىرگى تاڭدا ءتارتىپ ساقشىلارى قۇقىق بۇزۋشىلاردى انىقتاۋعا كىرىستى.
ايتا كەتەيىك, كوبەيتۋز كولى 2020 جىلى ەرەكشە قىزعىلت تۇسىمەن ەل نازارىن اۋدارىپ, بىردەن تانىمال تۋريستىك نىسانعا اينالعان. الايدا سول جىلى كولگە اعىلعان حالىقتىڭ سەلفي جاساپ, تۇز جيناۋعا ۇمتىلعانى تابيعي اپاتقا اكەلە جازدادى. سول سەبەپتى بيلىك سۋ ايدىنىنا كىرۋدى ۋاقىتشا شەكتەۋگە ءماجبۇر بولدى.
ەكولوگتار جۇرتشىلىققا ەسكەرتۋ جاسادى: كوبەيتۋز — فوتو تۇسىرەتىن ستۋديا دا, سۋۆەنير ساتاتىن دۇكەن دە ەمەس. بۇل – مۇقيات قورعالىپ, ساقتالۋى ءتيىس تابيعي مۇرا.
