جاڭالىقتار
اقمولا وبلىسىندا ۇيدەن شىعىپ كەتكەن 12 جاستاعى قىز بالا تراسسادان تابىلدى
اقمولا وبلىسىندا 12 جاستاعى قىز بالا تراسسادان تابىلدى, دەپ حابارلايدى Polisia.kz.
الماتى, NEGE. 1 شىلدەدە شورتاندى اۋدانىندا تۇراتىن 12 جاستاعى قىز بالانى استانا – پەتروپاۆل رەسپۋبليكالىق تراسساسىندا كوكشەتاۋ قالاسىنا قاراي ءوز كولىگىمەن كەلە جاتقان ديدار قىزىروۆ بايقاپ قالادى. جالعىز كەلە جاتقان قىز جۇرگىزۋشىنىڭ نازارىن اۋداردى جانە ديدار جاعدايدى ءبىلۋ ءۇشىن توقتادى. اڭگىمە بارىسىندا قىز شورتاندى اۋدانى مىقتىكول اۋىلىندا تۇراتىنىن جانە اتا-اناسىن حاباردار ەتپەي, ءوز ەركىمەن ۇيدەن كەتكەنىن ايتتى. جۇرگىزۋشى اسىعىس بولعاندىقتان جانە شورتاندى اۋدانىنا قايتار جول كوپ ۋاقىتتى قاجەت ەتەتىندىكتەن, قىزدى اقكول قالاسىنداعى ەڭ جاقىن پوليتسيا بولىمىنە اكەلۋ تۋرالى شەشىم قابىلدادى.
بولىمگە كەلگەننەن كەيىن كامەلەتكە تولماعاندار جونىندەگى ۋچاسكەلىك ينسپەكتور مۇرات بەكىشەۆ جاسوسپىرىمنەن بارلىعىن مۇقيات سۇراپ, مۇنداي ارەكەتىنىڭ سەبەبىن ءبىلدى. قىزدىڭ اتا-اناسى قىزىنىڭ ۇيدەن كەتكەنىن بىلمەگەندەرى بەلگىلى بولدى. ويتكەنى بۇل كەزدە ولار كوكشەتاۋ قالاسىنا بەت العان بولاتىن. ۇيدە قالۋعا ءماجبۇر بولعانىنا رەنجىگەن ءجاسوسپىرىم وبلىس ورتالىعىنا جاياۋ بارۋعا شەشىم قابىلدايدى.
پوليتسەيلەرمەن اڭگىمە بارىسىندا قىز اتا-اناسىنىڭ تەلەفون ءنومىرىن اتاي الماعاندىقتان مۇرات مىقتىكول اۋىلىنىڭ ۋچاسكەلىك ينسپەكتورىمەن بايلانىسقا شىعىپ, اكەسىمەن حابارلاسا الدى. قوبالجىعان اكەسى كوكشەتاۋدا ەكەنىن, ال قىزىن جاقىن تۋىسىنا تاپسىرۋىن ءوتىندى.
وقيعا ءساتتى اياقتالعانىنا قاراماستان, قىزدىڭ اتا-اناسى كامەلەتكە تولماعان بالانى تاربيەلەۋ مىندەتتەرىن ورىنداماعانى ءۇشىن اكىمشىلىك جاۋاپكەرشىلىككە تارتىلادى.
