جاڭالىقتار
اقمولادا 3 ادام قازا بولدى: پويىز بەن كولىك سوعىستى
فوتو: سكرين
اقمولا وبلىسىندا پويىز بەن جەڭىل كولىك سوقتىعىسىپ, ءۇش ادام قازا تاپتى. بۇل تۋرالى qandastar.kz اقپارات اگەنتتىگى كتكتەلەارناسىنا سىلتەمە جاساپ حابارلايدى.
جول اپاتى سالدارىنان جەڭىل كولىكتىڭ 25 جاستاعى جۇرگىزۋشىسى وقيعا ورنىندا كوز جۇمعان, ەكى جولاۋشى اۋرۋحانادا كوز جۇمدى.
ستەپنوگور-زوۆودسكوي جولىنداعى تەمىر جول وتكەلىندە Audi اۆتوكولىگى بوس تسيستەرنالارمەن كەلە جاتقان لوكوموتيۆكە سوعىلعان. قازا تاپقان ءۇش ادامنان بولەك, تاعى ءۇش جولاۋشى ءتۇرلى جاراقاتپەن ستەپنوگور قالاسىنداعى اۋرۋحاناعا جەتكىزىلىپتى. قايعىلى وقيعا بويىنشا تەرگەۋ ءجۇرىپ جاتىر.
“وقيعا ورنىندا اۆتوكولىك جۇرگىزۋشىسى قايتىس بولدى, ەكى جولاۋشى اۋرۋحانادا كوز جۇمدى, تاعى ءۇش جولاۋشى ءتۇرلى جاراقاتپەن ستەپنوگورسك اۋرۋحاناسىنا جەتكىزىلدى. تەرگەۋ شەڭبەرىندە اپاتتىڭ ءمان-جايى مەن سەبەپتەرى بەلگىلەنىپ, تەرگەۋ جۇرگىزىلىپ جاتىر”, – دەيدى اقمولا وبلىستىق پوليتسيا دەپارتامەنتى اقپارات-ساياسات ءبولىمىنىڭ جەتەكشى مامانى انار نۇكەنوۆا.
ەسكە سالساق, بۇعان دەيىن اقتوبە وبلىسىنداعى كەن-بايىتۋ كومبيناتىندا جۇك كولىگى اۋدارىلىپ, ەكى جۇمىسشى قازا تاپقانى تۋرالى جازعان ەدىك.
