جاڭالىقتار
اقمولادا دارىگەرلەر 39 ماگنيت جۇتقان كىشكەنتاي بالانى امان الىپ قالدى
فوتو: اشىق دەرەكككوز
اقمولا وبلىستىق بالالار اۋرۋحاناسىنىڭ حيرۋرگتارى ءتورت جاسار بالانىڭ ىشەگىنەن 39 ماگنيتتىك شاردى الىپ شىعىپ, ونىڭ ءومىرىن ساقتاپ قالدى, – دەپ حابارلايدى qandastar.kz دەنساۋلىق ساقتاۋ مينيسترلىگىنىڭ تەلەگرامم ارناسىنا سىلتەمە جاساي وتىرىپ.
دەنساۋلىق ساقتاۋ مينيسترلىگىنىڭ مالىمەتىنشە, ناۋقاس شۇعىل تۇردە زەرەندىدەن بالالار اۋرۋحاناسىنا 2 قاڭتار كۇنى جەتكىزىلگەن. كەنەتتەن بالانىڭ جاعدايى كۇرت ناشارلاپ, ءىشى قاتتى اۋىرسىنىپ, قايتا-قايتا لوقسي باستاعان. رەنتگەن اپپاراتىمەن تەكسەرۋ كەزىندە ناۋقاستىڭ ىشەگىندە كوپتەگەن بوگدە زاتتىڭ بارى انىقتالعان.
بالالار حيرۋرگى ءسالىمجان جاقىپوۆتىڭ ايتۋىنشا, وپەراتسيا شامامەن بەس ساعاتقا سوزىلعان.
— بالانىڭ توق ىشەگى مەن اش ىشەگى زاقىمدالىپ, پەرفوراتسيا مەن پەريتونيت تۋدىراتىن 39 دوڭگەلەك ءپىشىندى ماگنيت بولعان. ونى ىشەك جولدارىنان الىپ تاستاۋ جانە ونىڭ سالدارىن جويۋ اۋىر زاقىمدانۋعا بايلانىستى كۇردەلەنە ءتۇستى, –دەدى دارىگەر.
وپەراتسيانى حيرۋرگيا بولىمشەسىنىڭ مەڭگەرۋشىسى ەرنار قوجابەكوۆ جۇرگىزدى. تاجىريبەلى مامانداردىڭ بىلىكتىلىگى مەن ۋاقىتىلى ارالاسۋىنىڭ ارقاسىندا بالانىڭ ءومىرىن ساقتاي الدى.
