اقنار گۇلستاننىڭ ولىمىنە قاتىستى قىلمىستىق ءىس قوزعالدى

الماتى قالالىق پوليتسيا دەپارتامەنتىنىڭ تەرگەۋ باسقارماسى وتكەن جىلدىڭ شىلدە ايىندا الماتى تۇرعىنىنىڭ ءولىمى دەرەگى بويىنشا قىلمىستىق ءىس قوزعادى, دەپ حابارلادى  qandastar.kz    turkystan.kz.

«قازىرگى ۋاقىتتا بولعان وقيعانىڭ تولىق كورىنىسىن انىقتاۋ ءۇشىن جان-جاقتى تەرگەۋ ءجۇرىپ جاتىر.

تەرگەۋ شەڭبەرىندە ماتەريالدار جيناقتالىپ, تالدانۋدا, كۋالاردان جاۋاپ الىنۋدا, بەينەجازبالار زەردەلەنۋدە, زاڭدا كوزدەلگەن باسقا دا پروتسەسسۋالدىق ارەكەتتەر جۇزەگە اسىرىلۋدا.

تەرگەۋ بارىسى دەپارتامەنت باسشىلىعىنىڭ ەرەكشە باقىلاۋىندا.

ءبىز مارقۇمنىڭ تۋىستارىنىڭ باستان كەشكەن قايعىسىنا شىن جۇرەكتەن ورتاقتاسامىز. سونىمەن قاتار, سوڭعى پروتسەسسۋالدىق شەشىم بارلىق تاعايىندالعان ساراپتامالاردىڭ ناتيجەلەرىن العاننان كەيىن جانە قاجەتتى تەرگەۋ ارەكەتتەرىن جۇرگىزگەننەن كەيىن قابىلداناتىن بولادى»,  – دەلىنگەن حابارلامادا.

ەسكە سالايىق, 2024 جىلعى 20 شىلدەدە الماتىدا 22 جاستاعى ستۋدەنت اقنار گۇلستان تۇرعىن ءۇي كەشەنىنىڭ جەتىنشى قاباتىنان قۇلاپ, قايتىس بولعان. تەرگەۋ بۇل جاعدايدى سۋيتسيد رەتىندە تىركەگەن. الايدا مارقۇمنىڭ تۋىستارى ونىڭ ولەر الدىندا قاتىگەزدىكپەن ازاپتالىپ, كورشىلەرى تەرەزەدەن لاقتىرىپ جىبەرگەنىن ايتتى.