«Aqnár ózi syra ishýge shaqyrǵan». Kúdikti qyzdyń qorǵaýshysy el kútpegen málimdeme jasady

Bul týraly Instagram áleýmettik jelisinde Abdulla_kz_kz paraqshasy aqparat taratty.

Búgin kúdikti sanalǵan Dıdar Muqııattyń advokaty Jandos Palmanov «iske qatysty óz aıtarymyz bar» dep baspasóz máslıhatyn ótkizdi.

Baspasóz máslıhatynda is boıynsha qorǵalýǵa quqyǵy bar dep tanylǵan Dıdar Muqııat ta, ne onyń týystary da bolmady. Tek advokaty ǵana suraqtarǵa jaýap berdi. Advokattyń aıtýynsha, Aqnár Gúlistan sol túni qyzdardy syra iship otyraıyq dep ózi shaqyrǵan. Al «ony uryp, qınady» dep kórsetilgen beınejazba tolyq emes, sol túni «qos qyz kerisinshe ony tynyshtandyryp, sabyrǵa shaqyrǵan». 

Advokat Qytaı Halyq Respýblıkasynyń azamatshasy KIMEP túlegi Dıdar Muqııattyń qazirgi tańda áleýmettik jelide tarap ketken Aqnár Gúlistanǵa qatysty beınejazbalardan soń qoǵamnan qysym kórgenin aıtty. Sol úshin onyń iske esh qatysy joq ekenin jetkizý maqsatynda birneshe beınejazbany qorǵaýshy Palmanov jýrnalısterdiń nazaryna usyndy. Qorǵaýshy usynǵan beınejazbada qyzdyń buǵan deıin terezeden sekirmeshi bolyp júgirgen is-áreketi ári ony Dıdar Muqııattyń aǵasy sabyrǵa shaqyryp jatqany beınelengen. Aralaryndaǵy dıalog qytaı tilinde bolǵan.

Advokattyń aıtýynsha, túnde Aqnár teledıdardy syndyrady. Ol ózin jaman ustaı bastaıdy. Kadrlarda onyń edende qalaı jatyp, Qurannan súrelerdi aıqaılap aıtyp jatqanyn kórýge bolady. Osy ýaqytta qyzdar ony ustap, tynyshtandyrýǵa tyrysady.

Advokat túsindirgendeı, eki qyz basqa bólmelerde jasyrylady. Olar qaıtadan bólmelerden shyqqan kezde páterden Aqnárdi tappady. Sodan keıin ǵana olar terezeden qarap, dosynyń sekirip ketkenin kóredi.

Eske sala keteıik, 22 jastaǵy Aqnár Hamıt byltyr shilde aıynda Almatydaǵy Amir turǵyn úı kesheniniń 7 qabatyndaǵy páterdiń terezesinen qulap, kóz jumǵan. Marqumnyń anasy Gúlistan Hamıt qyzyn óler aldynda tanystary páterde ábden azaptaǵanyn aıtady. Ol Aqnár terezeden ózi sekirip ketýi múmkin degen boljammen úzildi-kesildi kelispeıdi. Marqumnyń anasy istiń ádil tekserilip, kinálilerdiń jaýapqa tartylýyn talap etedi.