اقپاندا اۋا رايى قالاي قۇبىلادى?

مامانداردىڭ مالىمەتتەرى بويىنشا, اقپان ايىنىڭ باسىندا سولتۇستىك-باتىس تسيكلونىنىڭ اسەرىنەن بۇلتتى اۋا رايى (قار, كوكتايعاق جانە جاڭبىر) بولجانادى, ەلدىڭ سولتۇستىك جارتىسىندا بۇرقاسىن بولادى. رەسپۋبليكا بويىنشا ەكپىندى جەل سوعادى, تۇمان تۇسەدى, كوكتايعاق بولادى.

رەسپۋبليكانىڭ باسىم بولىگىندە اقپاننىڭ العاشقى كۇندەرىندە اۋا تەمپەراتۋراسىنىڭ جوعارىلاۋى كۇتىلەدى:

• رەسپۋبليكانىڭ باتىسىندا جانە وڭتۇستىگىندە كۇندىز 0+10°س دەيىن;
• رەسپۋبليكانىڭ سولتۇستىك جارتىسىندا تۇندە -2-7°س دەيىن, كۇندىز -4+1°س دەيىن.

ەلىمىزدىڭ شىعىسىندا جانە ورتالىعىندا نەگىزگى تەمپەراتۋرالىق فون تۇندە -12-20°س, كۇندىز 0-8°س جىلى بولادى دەپ بولجانۋدا.

ءبىرىنشى ونكۇندىكتىڭ ەكىنشى جارتىسىندا قازاقستاندا سالەحارد وبلىسىنان كەلەتىن سۋىق انتيتسيكلوننىڭ اسەرىنەن اۋا تەمپەراتۋراسىنىڭ تومەندەۋى بولجانادى:

• رەسپۋبليكانىڭ سولتۇستىك جارتىسىندا تۇندە -28-35°س دەيىن, كۇندىز -20-25°س دەيىن;
• وڭتۇستىك جارتىسىندا تۇندە -13-20°س, كۇندىز -5-12°س دەيىن, تاۋلى ايماقتاردا جانە وڭتۇستىك وبلىستاردىڭ سولتۇستىگىندە تۇندە -30°س دەيىن, كۇندىز -20°س دەيىن.