اقش يراننىڭ يادرولىق نىساندارىنا سوققى جاسادى

فوتو: depositphotos.com/cholakov01

اقش پرەزيدەنتى دونالد ترامپ يراننىڭ يادرولىق نىساندارىنا سوققى جاساعانىن مالىمدەدى, دەپ حابارلايدى Qandastar.kz اقپارات پورتالى.

ترامپ سوققى جايلى Truth Social جەلىسىندە جازدى. سوققى جاسالعان نىسانداردىڭ قاتارىندا فوردو جەراستى كەشەنى بار.

«يراننىڭ ءۇش يادرولىق نىسانىنا ءساتتى سوققى جاسادىق, ولاردىڭ قاتارىندا فوردو, ناتانزۋ مەن يسفاحان بار. تولىققاندى سوققى باستى نىسان – فوردوعا جاسالدى. بەدەلدى امەريكالىق ساربازدارىمىزدى قۇتتىقتايمىن. الەمدە مۇنى ىستەي الاتىن اسكەر جوق», – دەپ جازدى ول.

ترامپتىڭ سوزىنشە, امەريكالىق ۇشاقتار يراننىڭ اۋە كەڭىستىگىنەن شىعىپ كەتكەن. سونداي-اق ول «قازىر بەيبىتشىلىك ورناتاتىن كەز كەلدى» دەپ جازدى.

يران بيلىگى ءۇش نىسانعا سوققى جاسالعانىن راستادى. Fars اگەنتتىگىنىڭ مالىمەتىنشە, اۋە قورعانىس كۇشتەرى ارەكەت ەتۋدى باستاعاندا «بىرنەشە جارىلىس ەستىلگەن».

«كۋم پروۆينتسياسىندا بىرنەشە ساعات بۇرىن اۋە قورعانىس كۇشتەرى ارەكەت ەتكەندە جاۋ نىساندارى بايقالدى. فوردو يادرولىق نىسانىنىڭ ءبىر بولىگى جاۋدىڭ اۋە سوققىسىنا ۇشىرادى», – دەلىنگەن حابارلامادا.

يراننىڭ مەملەكەتتىك باق وكىلدەرى «شابۋىل جاسالعان نىسانداردا يادرولىق ماتەريالدار بولماعانىن» جارىسا جازۋدا.