AQSh Irannyń ıadrolyq nysandaryna soqqy jasady

Foto: depositphotos.com/cholakov01

AQSh prezıdenti Donald Tramp Irannyń ıadrolyq nysandaryna soqqy jasaǵanyn málimdedi, dep habarlaıdy Qandastar.kz aqparat portaly.

Tramp soqqy jaıly Truth Social jelisinde jazdy. Soqqy jasalǵan nysandardyń qatarynda Fordo jerasty kesheni bar.

«Irannyń úsh ıadrolyq nysanyna sátti soqqy jasadyq, olardyń qatarynda Fordo, Natanzý men Isfahan bar. Tolyqqandy soqqy basty nysan – Fordoǵa jasaldy. Bedeldi amerıkalyq sarbazdarymyzdy quttyqtaımyn. Álemde muny isteı alatyn ásker joq», – dep jazdy ol.

Tramptyń sózinshe, amerıkalyq ushaqtar Irannyń áýe keńistiginen shyǵyp ketken. Sondaı-aq ol «qazir beıbitshilik ornatatyn kez keldi» dep jazdy.

Iran bıligi úsh nysanǵa soqqy jasalǵanyn rastady. Fars agenttiginiń málimetinshe, áýe qorǵanys kúshteri áreket etýdi bastaǵanda «birneshe jarylys estilgen».

«Kým provınııasynda birneshe saǵat buryn áýe qorǵanys kúshteri áreket etkende jaý nysandary baıqaldy. Fordo ıadrolyq nysanynyń bir bóligi jaýdyń áýe soqqysyna ushyrady», – delingen habarlamada.

Irannyń memlekettik BAQ ókilderi «shabýyl jasalǵan nysandarda ıadrolyq materıaldar bolmaǵanyn» jarysa jazýda.