الەم جاڭالىقتارى
اقش سوتى قىتايدان سovid-19 تارالۋىنا بايلانىستى 24 ميلليارد دوللار تالاپ ەتتى
فوتو: freepik
ءميسسۋريدىڭ فەدەرالدى سوتى قىتاي ۇكىمەتىن SARS-CoV-2 كوروناۆيرۋسى تۋرالى دەرەكتەردى جاسىرعانى ءۇشىن كىنالى دەپ تاۋىپ, بيلىكتەن 24 ملرد دوللار وتەماقى وندىرۋگە شەشىم شىعاردى. بۇل تۋرالى The New York Times جازدى,دەپ حابارلايدى qandastar.kz
اقش وتەماقىنىڭ قايتارىمى رەتىندە قىتاي اكتيۆتەرىن تاركىلەمەك.
قىتايدىڭ كوممۋنيستىك پارتياسىنا قارسى تالاپ-ارىزدى 2020 جىلى ءميسسۋريدىڭ بۇرىنعى باس پروكۋرورى ەريك شميتت بەرگەن. قۇجاتتا Covid-19 پاندەمياسىنىڭ العاشقى ايلارىندا پەكين ۆيرۋستىڭ بولۋى مەن تارالۋى تۋرالى دەرەكتەردى جاسىرىپ, باسقا ەلدەردە ماڭىزدى مەديتسينالىق جابدىقتاردى, سونىڭ ىشىندە جەكە قورعانىس قۇرالدارىن وندىرۋگە, سونداي-اق ولاردى ساتىپ الۋعا جانە ەكسپورتتاۋعا كەدەرگى كەلتىرگەنى ايتىلعان.
سوت شەشىمىندە قىتاي الەمدى پاندەميانىڭ قاۋپى مەن اۋقىمىنا قاتىستى اقپاراتپەن اداستىردى جانە جەكە قورعانىش قۇرالدارى وندىرىسىندەگى مونوپولياعا اكەلەتىن ارەكەتپەن اينالىستى دەلىنگەن. سول سەبەپتى اقش ۆيرۋستىڭ تارالۋىنا دەر كەزىندە توسقاۋىل قويا الماعانى جانە جەتكىلىكتى دەڭگەيدە جابدىقتاردى ساتىپ الا الماي قالعانى جايلى جازىلعان. Covid-19 ميسسۋريدەگى 2020 جانە 2021 جىلدارداعى ءولىمنىڭ ءۇشىنشى سەبەبى بولدى.
ۆاشينگتونداعى قىتاي ەلشىلىگىنىڭ وكىلى ليۋ پەنيۋي ەل سوت شەشىمىن مويىندامايتىنىن اتاپ ءوتتى. سونداي- اق ول ەگەر قىتايدىڭ مۇددەلەرى زارداپ شەگەتىن بولسا, جاۋاپ قايتارۋعا ۋادە بەردى.
