الەم جاڭالىقتارى
اقش-تا قۇلاعان ۇشاقتا الەم چەمپيوندارى بولعان – باق
فوتو:Pixabay
بۇگىن تاڭەرتەڭ American Airlines ۇشاعى ۆاشينگتونداعى پوتوماك وزەنىنە قۇلادى. بۇقارالىق اقپارات قۇرالدارىنىڭ مالىمەتىنشە, بورتتا بىرنەشە مانەرلەپ سىرعانۋشى بولۋى مۇمكىن, دەپ qandastar.kz اقپارات پورتالى Massaget.kz-كە سىلتەمە جاساپ حابارلايدى.
الدىن الا دەرەكتەر بويىنشا ۆيچيتادان ۆاشينگتونعا ۇشقان ۇشاق بورتىندا 60-قا جۋىق جولاۋشى بولعان. جۋىردا ۆيچيتادا مانەرلەپ سىرعاناۋدان اقش چەمپيوناتى ءوتتى.
«ەليتالىق ديۆيزيونعا ىرىكتەۋدەن وتكەن مانەرلەپ سىرعاناۋشىلار قوسىمشا ءبىر كۇنگە قالدى, كەيىن ولاردىڭ بىرنەشەۋى American Airlines 5342 رەيسىنە وتىرعان», – دەپ The Kansas City News باسىلىمى ۇلتتىق كوماندانىڭ مانەرلەپ سىرعانۋشىسى ليۋك ۆاننىڭ ءسوزىن كەلتىردى.
Sports.ru اقپاراتىنا سۇيەنسەك, سپورتشىلاردىڭ اراسىندا 1994 جىلعى جۇپتىق مانەرلەپ سىرعاناۋدان الەم چەمپيوندارى, رەسەيلىك ەۆگەنيا شيشكوۆا مەن ۆاديم ناۋموۆ بولۋى مۇمكىن. سپورتتاعى كارەراسىن اياقتاعاننان كەيىن ولار اقش-قا كوشىپ, جاتتىقتىرۋشىلىق قىزمەتىن جالعاستىرعان. ولاردىڭ ۇلى ماكسيم ناۋموۆ اقش قۇراماسىندا ونەر كورسەتەدى, وتكەن چەمپيوناتتا 4-ورىنعا يە بولعان.
Mash Telegram ارناسى بورتتا بولۋى مۇمكىن سپورتشىلار ءتىزىمىن جاريالادى.
- ەندريۋ تورگاشەۆ;
- ماكسيم ناۋموۆ;
- اليسا ەفيموۆا;
- ميشا ميتروفانوۆ;
- كەتي ماكبەت;
- دانيل پاركمان;
- كريستينا كاررەيرا;
- ەنتوني پونومارەنكو;
- الەكسەي ششەپەتوۆ;
- اننابەل موروزوۆ;
- ارتەم ماركەلوۆ;
- انتون سپيريدونوۆ;
- دانيلا ساۆەلەۆ.
- اقش-تىڭ مانەرلەپ سىرعاناۋ قاۋىمداستىعى بۇل وقيعاعا قاتىستى پىكىر بىلدىرگەن جوق.
بۇعان دەيىن نە بەلگىلى?
ەسكە سالايىق, 2025 جىلى 30 قاڭتاردا اقش استاناسى ۆاشينگتونداعى رونالد رەيگان اۋەجايىنىڭ ماڭىندا ۇشاق تىكۇشاقپەن سوقتىعىسىپ, وزەنگە قۇلاعانى حابارلاندى.
وقيعا ماڭىندا قۇتقارۋشىلار جۇمىس ىستەپ جاتىر. سونىمەن قاتار, تىكۇشاقتار مەن قايىقتار جۇمىلدىرىلعان.
كەيىنىرەك پوتوماك وزەنىنە قۇلاعان ۇشاق بورتىندا 60 جولاۋشى مەن ءتورت ەكيپاج مۇشەسى بولعانى ايتىلدى.
