الەم جاڭالىقتارى
اقش-تاعى پرەزيدەنت سايلاۋىنا 1 كۇن قالدى: ساۋالنامالار نە دەيدى?
امەريكاداعى Five Thirty Eight ساۋالناما پورتالى ءارتۇرلى ينستيتۋتتاردىڭ سوڭعى ساۋالنامالارىنىڭ ورتاشا ناتيجەلەرىن جاريالادى, دەپ حابارلايدى qandastar.kz Ulysmedia.kz-كە سىلتەمە جاساپ.
3 قاراشا, ياعني سايلاۋعا ەكى كۇن قالعاندا, اناليتيكتەردىڭ جاريالاعان دەرەكتەرىنە سايكەس, ەل بويىنشا قولداۋ دەڭگەيى: حارريس ءۇشىن 47,9% جانە ترامپ ءۇشىن 47,0% قۇراعان.
5 قاراشاداعى سايلاۋدىڭ نازارىندا جەتى «قۇبىلمالى» شتات بار: اريزونا, دجوردجيا, نەۆادا, ميچيگان, سولتۇستىك كارولينا, پەنسيلۆانيا جانە ۆيسكونسين.
بۇل شتاتتاردا سايلاۋشىلاردىڭ داۋىسى ءۇشىن كۇرەس اسىرەسە قىزۋ ءجۇرىپ جاتىر, ال حارريس پەن ترامپ اراسىنداعى ايىرما كوبىنەسە مينيمالدى. مۇندا كىم جەڭسە – ايىرما قانشالىقتى از بولسا دا ءتيىستى شتاتتىڭ بارلىق داۋىسىن الادى.
3 قاراشاداعى ساۋالنامالار ناتيجەلەرى Five Thirty Eight-تە تومەندەگىدەي كورسەتىلگەن:
• اريزونا: ترامپ 49% / حارريس 46,5%
• دجوردجيا: ترامپ 48,5% / حارريس 47,1%
• نەۆادا: ترامپ 47,9% / حارريس 47,3%
• ميچيگان: حارريس 47,8% / ترامپ 47,1%
• سولتۇستىك كارولينا: ترامپ 48,4% / حارريس 47,2%
• پەنسيلۆانيا: ترامپ 48% / حارريس 47,7%
• ۆيسكونسين: حارريس 48,2% / ترامپ 47,4%
سايلاۋعا دەيىنگى سوڭعى كۇندەردە ەكى كانديدات تا وزدەرىنىڭ ناتيجەلەرىن جاقسارتۋ ءۇشىن نەگىزىنەن وسى جەتى «قۇبىلمالى» شتاتتا بەلسەندىلىك تانىتۋدا.
امەريكا قۇراما شتاتتارىندا 538 سايلاۋشى داۋسى بار. پرەزيدەنتتى سايلاۋ ءۇشىن وسى 538 داۋىستىڭ 270 داۋسى قاجەت. كاليفورنيا شتاتى ەڭ كوپ سايلاۋشى (54) بار شتات.
