اقش جاڭا يادرولىق بومبا جاسادى

اقش ەنەرگەتيكا ءمينيسترى كريس رايت تەحاس شتاتىنداعى اماريللو قالاسىندا ورنالاسقان Pantex يادرولىق قارۋ زاۋىتىندا B61-13 دەپ اتالاتىن جاڭا يادرولىق ەركىن قۇلايتىن بومبا جاساعانىن رەسمي تۇردە مالىمدەدى. بۇل تۋرالى Qandastar.kz سايتى NNSA سايتىنا سىلتەمە جاساپ حابارلايدى.

مينيستر رايتتىڭ ايتۋىنشا, يادرولىق ارسەنالدى جاڭارتۋ بۇرىنعى پرەزيدەنت دونالد ترامپتىڭ «كۇش ارقىلى بەيبىتشىلىك» قاعيداتىن جۇزەگە اسىرۋدا شەشۋشى ءرول اتقارادى.

B61-13 بومبالارىن تەك ستراتەگيالىق بومبالاۋشى ۇشاقتار الىپ جۇرە الادى جانە ولاردى اقش-تىڭ قۇرلىقتاعى اسكەري بازالارىندا ورنالاستىرۋ جوسپارلانىپ وتىر.

2023 جىلدىڭ قازان ايىندا پەنتاگون B61 يادرولىق بومباسىن B61-13 نۇسقاسىنا دەيىن جاڭارتۋعا نيەتتى ەكەنىن مالىمدەگەن ەدى. بۇل شەشىم «پوتەنتسيالدى قارسىلاستار تاراپىنان تونەتىن قاۋىپتەردىڭ ارتۋىنا» بايلانىستى قابىلدانعان. NNSA باسشىسىنىڭ مىندەتىن اتقارۋشى تەرەزا روببينس بيىلعى مامىر ايىندا B61-13 بومبالارىنىڭ جاپپاي ءوندىرىسى باستالاتىنىن حابارلاعان.

Defense News باسىلىمىنىڭ مالىمەتىنشە, B61-13 بومباسىنىڭ قۋاتى B61-7 نۇسقاسىنا ۇقساس بولادى جانە ەسكىرگەن ەركىن قۇلايتىن بومبالاردىڭ بىرقاتارىن الماستىرادى. امەريكالىق عالىمدار فەدەراتسياسىنىڭ (FAS) دەرەگىنشە, B61-7 بومباسىنىڭ ەڭ جوعارى قۋاتى – 360 كيلوتوننا.

2024 جىلدىڭ قاڭتارىندا NNSA B61-12 تەرمويادرولىق بومبالارىن جاڭعىرتۋ باعدارلاماسى اياقتالعانىن حابارلاعان. B61 وتباسى اقش يادرولىق ارسەنالىنداعى ەڭ كونە جانە امبەباپ قارۋ ءتۇرى. B61-12 نۇسقاسى B61-3, B61-4, B61-7 جانە B61-10 بومبالارىن الماستىرادى. بۇل نۇسقانىڭ قۋاتى 50 كيلوتونناعا دەيىن, ولاردى F-35A جويعىش ۇشاقتارى جەتكىزىلەدى.