«اقشانى تۇگەل اۋدارىڭدار». قايرات پەن «اسار-ۋمەنىڭ» اراسىندا قانداي كونفليكت بولدى?

«اسار-ۋمە» قورىنىڭ جەتەكشىسى اسحات نۇرماشەۆ اتىشۋلى پەريزات قايراتتىڭ ءىسى بويىنشا سوتتا كۋالىك بەردى دەپ جازادى qandastar.kz

اسحاتتىڭ يەلىگىندەگى قور بىلتىر گازا سەكتورىنداعى تۇرعىندارعا گۋمانيتارلىق كومەك دەپ «BizBirgemiz Qazaqstan 2030» قورىنا 200 ملن تەڭگە اۋدارعان.

Ertenmedia حابارلاعانداي,نۇرماشەۆ پەريزات قايراتپەن بۇرىننان تانىس-ءبىلىس ەكەنىن, بۇعان دەيىن دە بىرقاتار اكتسيالاردا كەزدەسىپ, ارالاسىپ-قۇرالاسىپ تۇرعانىن ايتادى.

2023 جىلى تاياۋ شىعىستاعى احۋال ۋشىعىپ كەتكەندە, پەريزات پالەستينا ەلشىلىگىمەن ارنايى مامىلەسى بارىن ايتىپ, زارداپ شەككەن قاۋىمعا جىلۋ جيناي باستايدى.

سول تۇستا ونىڭ حالىقارالىق گۋمانيتارلىق حاب ورنالاسقان ءابۋ-دابيدەگى ۇلكەن قويماعا ەمىن-ەركىن كىرىپ-شىعاتىنى دا بەلگىلى بولعان.

اقشا جيناۋدى باستاماس بۇرىن «اسار-ۋمە» قورىنىڭ وكىلدەرى پەريزاتتىڭ شاقىرۋىمەن الگى قويمانى كوزىمەن كورىپ قايتقان. ساپار شىعىنىن تولىقتاي پەريزاتتىڭ ءوزى كوتەرگەن. نۇرماشەۆ اقشانىڭ قايدان كەلگەنىن سۇراماعان.

«پەريزات سول قويماعا ەرتىپ اپاردى. بۇل 2023 جىلدىڭ 11 قاراشاسى ەدى. ءۇش كۇن بۇرىن عانا ول بىزگە سكلادقا كىرىپ-شىعاتىن ارنايى رۇقساتى بارىن, ءتىپتى ءباا-نىڭ بيلەۋشى وتباسىمەن دە امپەي-جامپەي ەكەنىن ايتقان بولاتىن. ول قويماعا ەكىنىڭ ءبىرى كىرە المايدى, كىرۋگە ارنايى اككرەديتاتسيا قاجەت», – دەيدى نۇرماشەۆ.

ءسويتىپ, نەبارى 5 كۇننىڭ ىشىندە «اسار-ۋمەنىڭ» ۇندەۋىنە ءۇن قاتقان قازاقتاردان جالپى سوماسى 293 ملن تەڭگە جينالعان. قور باسشىلىعى الگى سومانى بىردەن تولىق جىبەرۋگە جۇرەكسىنىپ, اقشانى ءبولىپ-ءبولىپ اۋدارۋدى ۇسىنعان.

پەريزات بولسا, كەرىسىنشە, اقشانى ءباسىبۇتىن جىبەرۋدى تالاپ ەتەدى.

«قور قۇرىلتايشىلارىمەن كەڭەسە كەلە, اقشانى 50 ملن-نان ترانشتاپ جىبەرۋگە شەشىم قابىلدادىق. قوردىڭ تاريحىنداعى ەڭ ۇلكەن گۋمانيتارلىق جوبا ەدى. جاۋاپكەرشىلىك اۋىر. ونىڭ ۇستىنە, قاقتىعىس ايماعىنا العاش رەت كومەك جىبەرىپ وتىرعاندىقتان, تاۋەكەلگە بارمادىق.

پەريزات اقشانى تولىق جىبەرۋىمىزدى تالاپ ەتىپ, بەت-باقتىرماي قويدى. ايتۋىنشا, ءابۋ-دابيدەگى حاب باسشىلارى الەمنىڭ تۇكپىر-تۇكپىرىنەن تۇسەتىن ميلليونداعان دوللارلى ترانشپەن جۇمىس ىستەيدى ەكەن.

سول سەبەپتى ءبىز جىبەرگەلى وتىرعان شاعىن سوما ولاردىڭ تالابىنا سايكەس كەلمەيتىن كورىنەدى», – دەدى اسحات نۇرماشەۆ سوتتا.

اقىرى ەكى جاق 200 ملن تەڭگەنى بىردەن جىبەرىپ, قالعان 93 ملن-دى ەسەپ بەرگەننەن كەيىن اۋدارۋعا كەلىسەدى. الايدا پەريزات ۇسىنعان ەسەپ-قيساپقا كوڭىلى تولماعان «اسار-ۋمە» قالعان قارجىنى اۋدارۋدان باس تارتقان.