«Aqshany túgel aýdaryńdar». Qaırat pen «Asar-Ýmeniń» arasynda qandaı konflıkt boldy?

«Asar-Ýme» qorynyń jetekshisi Ashat Nurmashev atyshýly Perızat Qaırattyń isi boıynsha sotta kýálik berdi dep jazady qandastar.kz

Ashattyń ıeligindegi qor byltyr Gaza sektoryndaǵy turǵyndarǵa gýmanıtarlyq kómek dep «BizBirgemiz Qazaqstan 2030» qoryna 200 mln teńge aýdarǵan.

Ertenmedia habarlaǵandaı,Nurmashev Perızat Qaıratpen burynnan tanys-bilis ekenin, buǵan deıin de birqatar akııalarda kezdesip, aralasyp-quralasyp turǵanyn aıtady.

2023 jyly Taıaý Shyǵystaǵy ahýal ýshyǵyp ketkende, Perızat Palestına elshiligimen arnaıy mámilesi baryn aıtyp, zardap shekken qaýymǵa jylý jınaı bastaıdy.

Sol tusta onyń halyqaralyq gýmanıtarlyq hab ornalasqan Ábý-Dabıdegi úlken qoımaǵa emin-erkin kirip-shyǵatyny da belgili bolǵan.

Aqsha jınaýdy bastamas buryn «Asar-Ýme» qorynyń ókilderi Perızattyń shaqyrýymen álgi qoımany kózimen kórip qaıtqan. Sapar shyǵynyn tolyqtaı Perızattyń ózi kótergen. Nurmashev aqshanyń qaıdan kelgenin suramaǵan.

«Perızat sol qoımaǵa ertip apardy. Bul 2023 jyldyń 11 qarashasy edi. Úsh kún buryn ǵana ol bizge skladqa kirip-shyǵatyn arnaıy ruqsaty baryn, tipti BAÁ-nyń bıleýshi otbasymen de ámpeı-jámpeı ekenin aıtqan bolatyn. Ol qoımaǵa ekiniń biri kire almaıdy, kirýge arnaıy akkredıtaııa qajet», – deıdi Nurmashev.

Sóıtip, nebári 5 kúnniń ishinde «Asar-Ýmeniń» úndeýine ún qatqan qazaqtardan jalpy somasy 293 mln teńge jınalǵan. Qor basshylyǵy álgi somany birden tolyq jiberýge júreksinip, aqshany bólip-bólip aýdarýdy usynǵan.

Perızat bolsa, kerisinshe, aqshany basybútin jiberýdi talap etedi.

«Qor quryltaıshylarymen keńese kele, aqshany 50 mln-nan transhtap jiberýge sheshim qabyldadyq. Qordyń tarıhyndaǵy eń úlken gýmanıtarlyq joba edi. Jaýapkershilik aýyr. Onyń ústine, qaqtyǵys aımaǵyna alǵash ret kómek jiberip otyrǵandyqtan, táýekelge barmadyq.

Perızat aqshany tolyq jiberýimizdi talap etip, bet-baqtyrmaı qoıdy. Aıtýynsha, Ábý-Dabıdegi hab basshylary álemniń túkpir-túkpirinen túsetin mıllıondaǵan dollarly transhpen jumys isteıdi eken.

Sol sebepti biz jibergeli otyrǵan shaǵyn soma olardyń talabyna sáıkes kelmeıtin kórinedi», – dedi Ashat Nurmashev sotta.

Aqyry eki jaq 200 mln teńgeni birden jiberip, qalǵan 93 mln-dy esep bergennen keıin aýdarýǵa kelisedi. Alaıda Perızat usynǵan esep-qısapqa kóńili tolmaǵan «Asar-Ýme» qalǵan qarjyny aýdarýdan bas tartqan.