«اقشانىڭ ءبارى سىرتقا كەتىپ جاتىر» — دەپۋتات قۇرىلىس سالاسىن سىنادى

فوتو: اشىق دەرەككوز

ءماجىلىس دەپۋتاتى ۇلىقبەك تۇماشينوۆ الداعى جىل ەلدەگى قۇرىلىس سالاسىندا قىمباتشىلىق ورنايتىنىن ايتتى. دەپۋتات «Adal Adam» youtube-ارناسىنا بەرگەن سۇحباتىندا مۇنىڭ بىرنەشە سەبەبىن اتاعان. ونىڭ پىكىرىنشە, الدىمەن قازاقستانداعى قۇرىلىس ماتەريالدارىنىڭ ءوندىرىسى كەمشىن. سوندىقتان يمپورتقا تاۋەلدىلىك ارتىپ, كەيىنگى باعا ساياساتىنا اسەر ەتىپ وتىر, دەپ جازدى qandastar.kz

«وكىنىشكە قاراي قازاقستاندا قۇرىلىس مەتەريالدارىنىڭ ءوندىرىسى جوق. بىزدە تەك قۇم, تاس, شيىرشىق, تسەمەنت عانا بار. سوندىقتان قۇرىلىس ماتەريالدارى رەسەي, قىتاي سەكىلدى ەلدەردەن اكەلىنەدى», — دەدى ول.
دەپۋتاتىڭ سوزىنە سەنسەك, گەوساياسي جاعداي ۋشىقسا, يمپورتقا ىقپال ەتىپ, باعانى تۇراقتاندىرۋ قيىن بولماق. تۇماشينوۆ مىسال رەتىندە بۇقتىرما سۋ قويماسى ارقىلى وتەتىن كوپىر قۇرىلىسىنا قاتىستى دەرەكتى جەتكىزگەن.

«بۇقتىرما كوپىرىنىڭ مىسالىن كەلتىرەيىك. العاش كەلىسىمشارتقا جاساعان كەزدە جوبانىڭ باعاسى بولەك بولدى, ياعني 29 ملرد تەڭگە ەدى. 2021 جىلى قاجەتتى قۇرىلىس ماتەريالىن الۋ ءۇشىن ۋكرايناداعى «ازوۆستال» مەتاللۋرگيا كومبيناتىمەن كەلىسىم جاسالعان بولاتىن. كەيىن ەكى ەل اراسىندا سوعىس باستالىپ كەتىپ, امالسىز قۇرىلىس زاتتارىن رەسەيدەن الدىق. سول كەزدە سانكتسياعا بايلانىستى 1 تەڭگە 7 رۋبل شاماسىندا بولدى. قۇرىلىس ماتەريالدارىنىڭ ءبارى قىمباتتادى. دەمەك, الداعى ۋاقىتتا رەسەي-ۋكراينا اراسىنداعى قاقتىعىس نارىققا اسەر ەتپەي قويمايدى», — دەدى ۇلىقبەك شابدان ۇلىنى.
سونداي-اق سالا مامانى قۇرىلىس سالاسىنا بولىنەتىن بيۋدجەتتىڭ جارىمىنا جۋىعى وزگە ەلدەرگە كەتىپ جاتقانىن اشىنا ايتقان. بۇل ولقىلىقتى قالپىنا كەلتىرۋ ءۇشىن قۇرىلىس ونەركاسىبىن قالىپتاستىرۋدى ۇسىنۋدا.

«العاشقىلاردىڭ ءبىرى بولىپ «نەلىكتەن بىزدە قۇرىلىس مينيسترلىگى جوق?» دەگەن ماسلە كوتەردىم. ناتيجەسىندە ونەركاسىپ جانە قۇرىلىس مينيسترلىگى قۇرىلدى. ەندىگى كەزەكتە قۇرىلىس ماتەريالدارىنىڭ ءوندىرىسىن قالىپتاستىرۋ كەرەك.

تام-تۇمداپ تاپقان اقشانى قۇرىلىس ماتەريالىن ساتىپ الۋ ءۇشىن باسقا ەلگە بەرىپ وتىرمىز. مىسالى, جىلىنا ەل بيۋدجەتىنىڭ 20 پايىزعا جۋىعى قۇرىلىسقا جۇمسالادى. ونىڭ جارتى بولىگى شەت مەملەكەتكە كەتىپ جاتىر دەگەن ءسوز», — دەدى ول.