اقتاۋدا 100 جاس مامان «جاس باسقارۋشىلار» مەكتەبىن ءبىتىردى

اقتاۋدا اۋدان, قالادان كەلگەن 100 جاس مامان «جاس باسقارۋشىلار» مەكتەبىن ءبىتىردى. مۇعالىمدەردى قۇتتىقتاۋعا ماڭعىستاۋ وبلىستىق ءبىلىم باسقارماسى باسشىسىنىڭ ورىنباسارى ايجاقسى تۇرجانوۆا كەلىپ, العىس حات پەن سەرتيفيكات تابىستادى.

«پرەزيدەنت قاسىم-جومارت توقاەۆتىڭ بەرىپ جاتقان بارلىق مۇمكىندىگى, ءبىلىم سالاسىنداعى تالابى, «پەداگوگ مارتەبەسى» تۋرالى زاڭ شىققاننان كەيىنگى قولداۋى, وسىنىڭ بارلىعى جاس پەداگوگتەر ءۇشىن جاسالىپ جاتىر. وسى ەكى ايعا سوزىلعان وقىتۋ جاس مامانداردىڭ بىلىكتىلىگىن ارتتىرۋعا, تاجىريبە الماسۋعا مۇمكىندىك بەردى. ەندى العان ءبىلىمىڭىزدى جاڭا ەنەرگيامەن جەتىستىك جولىنا جۇمساۋعا تىلەكتەسپىن. قىزمەت ەتۋ ءۇشىن سىزدەردە جانىپ تۇرعان ەنەرگيا, مىقتى يدەيا, ناقتى ماقسات پەن جوسپار بولۋى كەرەك. زامان تالابىنا ساي پەداگوگ ۇنەمى ىزدەنىس ۇستىندە بولۋى كەرەك. سوندىقتان جاڭا قازاقستاننىڭ جاڭا پەداگوگى بولۋ جولىندا ءتۇرلى جوبالارعا قاتىسىپ, بەلسەندىلىك تانىتقاندارىڭىز ءۇشىن العىس بىلدىرەمىن», — دەدى ماڭعىستاۋ وبلىستىق ءبىلىم باسقارماسى باسشىسىنىڭ ورىنباسارى ايجاقسى تۇرجانوۆا.

سالتاناتتى شارا بارىسىندا وقىتۋعا قاتىسقان بارلىق جاس مامانعا سەرتيفيكات بەرىلدى. ال بەلسەندىلىگىمەن كوزگە ءتۇسىپ, ۇزدىك اتانعان 10 جاس مامانعا ماڭعىستاۋ وبلىسى ءبىلىم باسقارماسىنىڭ باسشىسى دينارا جۇماشەۆانىڭ العىس حاتى تابىستالدى.

سودان سوڭ شارا جاس مامانداردىڭ كونتسەرتتىڭ باعدارلاماسىمەن جالعاستى.

ەسكە سالايىق, ەكى ايعا سوزىلعان وقىتۋدا جاس ماماندارعا استانا, الماتىدان كەلگەن جانە جەرگىلىكتى جەردىڭ بىلىكتى ترەنەرلەرى ءبىلىم بەردى. ولار «كوشباسشى ءيميدجى», «گرانت. جوبا. كونكۋرس», «قارجىلىق مەنەدجمەنت», «جوبالىق باسقارۋ», «جەكە برەند. سمم» تاقىرىپتارىن تەرەڭىنەن ءتۇسىنىپ, پايدالى اقپاراتتار الدى. سونىڭ ناتيجەسىندە جاس ماماندار جوبا جاساقتاپ, جەكە برەندىن دامىتۋدى جوسپارلاپ وتىر.

سونىمەن قاتار جاس مامانداردىڭ داعدىسىن ارتتىرۋ ماقساتىندا العاشقى مەديتسينالىق كومەك كورسەتۋ ەرەجەلەرى مەن توتەنشە جاعدايدىڭ الدىن الۋ بويىنشا مالىمەتتەر ءتۇسىندىرىلدى. Yessenov University-ءنىڭ اكادەميالىق جۇمىس جونىندەگى ۆيتسە-پرەزيدەنتى, ە.ع.ك., رف كومپيۋتەرلىك عىلىمدار اكادەمياسىنىڭ كوررەسپوندەنت-مۇشەسى قايىربەك ماكۋلوۆپەن TED فورماتىندا كەزدەسۋ ۇيىمداستىرىلدى.

«جاس باسقارۋشىلار» مەكتەبى «جاس مامان» جوباسى اياسىندا ءوتتى. جوبا ماڭعىستاۋ وبلىستىق ءبىلىم باسقارماسىنىڭ تاپسىرىسى نەگىزىندە ازاماتتىق باستامالاردى قولداۋ ورتالىعىمەن بىرلەسە وتكىزىلدى.