جاڭالىقتار
اقتاۋدا وتكەن حالىقارالىق ونەر بايقاۋىندا وقىس جاعداي بولدى
فوتو: lada.kz
اقتاۋدا وتكەن AKTAU-MUSIC-FEST حالىقارالىق ونەر بايقاۋى توتەنشە جاعدايمەن جالعاستى. مۇرات وسكىنباەۆ اتىنداعى فيلارمونيا ساحناسىندا ۇيىمداستىرىلعان شارا بارىسىندا زالدا اۋا تەمپەراتۋراسىنىڭ جوعارى بولۋىنا بايلانىستى بىرنەشە قاتىسۋشى ەسىنەن تانىپ قالدى, دەپ حابارلايدى qandastar.kz BAQ.KZ-كە سىلتەمە جاساپ.
كورەرمەندەردىڭ ايتۋىنشا, فيلارمونيا عيماراتىندا كونديتسيونەرلەر ىستەمەيدى نەمەسە سالقىنداتۋ جۇيەسى جۇكتەمەنى كوتەرە الماي وتىر. قاتىسۋشىلار تاڭعى ساعات 10-نان باستاپ سالقىنداتىلماعان بولمەلەردە بولعان. تۇستەن كەيىن بىرنەشە بالا ەسىنەن تانىپ, جەدەل جاردەم كومەگىنە جۇگىنۋگە ءماجبۇر بولدى. دارىگەرلەر العاشقى كومەك كورسەتتى, بىراق كەي اتا-انالار بالالاردىڭ جاعدايى ءالى دە قاناعاتتانارلىقسىز ەكەنىن ايتۋدا.
اتا-انالار مەن كورەرمەندەر ۇيىمداستىرۋشىلاردىڭ نەمقۇرايلىعىنا نارازى. قاتىسۋشىلاردىڭ اتا-انالارى ءتيىستى ورگانداردان جاعدايدى شۇعىل تۇردە شەشۋدى جانە بالالار ءۇشىن قاۋىپسىز ورتا قالىپتاستىرۋدى تالاپ ەتىپ وتىر.
