اقتاۋدا ساربازدار جاۋىنگەرلىك درون قۇراستىردى

اقتاۋدا تەڭىز جاياۋ اسكەرى بريگاداسىنىڭ ساربازدارى جاۋىنگەرلىك درون جاساپ شىعاردى. ۇرىس ماشيناسى 10 كەلى تارتادى. شاعىن پىشىندەگى بروندى تەحنيكا كوشە جاعدايىندا قولدانىسقا ىڭعايلى.

ەڭ قىزىعى, ونى ونەرتاپقىش ساربازدار قولدا بار قۇرالداردان قۇراستىرعان. اسكەري ءبولىم باسشىلىعى ەرەكشە جوبانى قولداپ, وعان پۋلەمەت ورناتۋعا رۇقسات بەرگەن.  جاۋىنگەرلىك دروندى قاتارداعى جاۋىنگەرلەر ءجۇسىپ بارمانقۇلوۆ پەن باتتال وسمانوۆ قۇراستىردى. ونەرتاپقىش جىگىتتەر ون اي بۇرىن تۇركىستان وڭىرىنەن اسكەرگە شاقىرتىلعان. ەكەۋى دە وقۋشى كەزىنەن روبوتوتەحنيكامەن اۋەستەنەدى.  باتتال جاستايىنان كومپيۋتەرلىك ديزاين ونەرىن مەڭگەرسە, ءجۇسىپ «تەحنيك-ەلەكتريك» ماماندىعى بويىنشا كوللەدج بىتىرگەن.  جوبا اۆتورلارى ەكى اپتا بويى سىزباسىن جاساپ, دروندى اسكەري قويمادا بار بولشەكتەن قۇراستىرعان.

بروندى ماشينا جەڭىل كولىكتىڭ اككۋمۋلياتورىنان قۋات الادى. ساعاتىنا 15 شاقىرىم جىلدامدىقپەن جۇرۋگە قاۋقارلى. 7,62 كاليبرى پۋلەمەت قوندىرىلعان مۇناراسى 360 گرادۋسقا بۇرىلادى. وپەراتور دروندى قاۋىپسىز جەردەن باسقارىپ, جاۋعا ءبىر مينۋتتا 500-600 وق جاۋدىرادى. ءجۇسىپ بارمانقۇلوۆ, قاتارداعى جاۋىنگەر: — قاشىقتىقتان باسقارىلاتىن «بارىس» اتتى ماشينا ويلاپ تاپتىق. بۇل ماشينانىڭ ارتىقشىلىقتارى — جاۋدىڭ ءتىرى كۇشىن جانە جەڭىل بروندى تەحنيكالارىن جويۋعا ارنالعان قۇرىلعى. تەگىس جولدا دا, تەگىس ەمەس جولدا دا جىلدامدىعى بىردەي. ەردوس سايموۆ, روتا كومانديرى: — بۇل ەكى ساربازدى مەن ءبىرىنشى كۇننەن باستاپ جاقسى تانيمىن. ءوز ىستەرىنىڭ شەبەرى, وسى اسكەري قىزمەتىن اتقارۋ بارىسىندا وزدەرىن تەك قانا جاقسى جاعىنان كورسەتە ءبىلدى. الداعى ۋاقىتتا قورعانىس مينيسترلىگىنىڭ تاراپىنان ەلىمىزدىڭ جوعارى وقۋ ورنىندا تەگىن تۇردە ءبىلىم الۋعا جولداما بەرىلەدى.

ساربازدار جوباسىن ۋنيۆەرسيتەت قابىرعاسىندا جەتىلدىرۋدى كوزدەيدى. وعان قۋاتتى قوزعالتقىش پەن گرانات اتقىش ورناتىپ, تانك نەمەسە اۋەدەن بارلاۋشى دروندى جويۋعا قابىلەتتى ەتپەك.