اقتاۋدا تەگىن دونەرگە تالاسقاندار ءبىر-ءبىرىن تاپتاپ كەتە جازداعان

ماڭعىستاۋ وبلىسى مۇنايلى اۋدانىنىڭ قىزىلتوبە اۋىلىندا تەگىن دونەر مەن سۋشي تاراتۋعا ارنالعان اكتسيا جانجالمەن اياقتالدى, دەپ حابارلايدى qandastar.kz

فاستفۋد ءدامحاناسىنىڭ يەسى الەۋمەتتىك جەلىدە تەگىن تاماق تاراتىلاتىنىن حابارلاعاننان كەيىن, وقيعا ورنىنا كوپ تۇرعىندار جينالىپ, ءبىر-ءبىرىن تاپتاپ كەتە جازداعان.

جينالعان حالىقتىڭ سانىن كورگەن ءدامحانا يەسى جاعدايدى باقىلاۋدا ۇستاي الماي قالدى. وقيعا ورنىنا پوليتسيا قىزمەتكەرلەرى كەلىپ, جۇرتتى سابىرعا شاقىردى.

ماڭعىستاۋ وبلىستىق پوليتسيا دەپارتامەنتىنىڭ مالىمەتىنشە, كاسىپكەرمەن پروفيلاكتيكالىق اڭگىمە جۇرگىزىلگەن. ءدامحانا يەسى تۇرعىنداردىڭ كوپ جينالاتىنىن كۇتپەگەنىن ايتىپ, كەلەسى جولى مۇنداي جاعدايدى بولدىرماۋعا ۋادە بەردى.

«قىزىلتوبە اۋىلىندا حالىق كوپ جينالعاندىقتان, تەگىن تاماق تاراتۋ ورنىن وزگەرتىپ, باسقا اۋىلدا وتكىزدىك. بولاشاقتا بۇل جاعداي قايتالانبايدى. كەشىرىم سۇرايمىن», – دەدى كاسىپكەر.

ەسكە سالساق, بۇعان دەيىن اقتوبەدە تەگىن دونەر تاراتقان كاسىپكەرگە ايىپپۇل سالىنعان بولاتىن.