جاڭالىقتار
اقتاۋدا توعىزقۇمالاقتان وبلىستىق اشىق چەمپيونات ءوتتى
6 تامىز كۇنى تەڭىز جاعالاۋىندا «ۇلتتىق قۇندىلىق – ۇلتتىڭ قازىناسى» جوباسى اياسىندا توعىزقۇمالاقتان وبلىستىق اشىق چەمپيونات ءوتتى. چەمپيوناتتىڭ ماقساتى – جاستار اراسىندا ۇلتتىق ويىندى ناسيحاتتاپ, بۇقارالىق سيپاتىن ارتتىرۋ.
شارانى «جەتى جۇرت» قوعامدىق بىرلەستىگى وبلىستىق جاستار ساياساتى ماسەلەلەرى جونىندەگى باسقارماسىنىڭ تاپسىرىسىمەن, ازاماتتىق باستامالاردى قولداۋ ورتالىعىنىڭ قولداۋىمەن وتكىزەدى.
اشىق چەمپيوناتقا وڭىردەگى 15-25 جاسقا دەيىنگى جانە 25-35 جاسقا دەيىنگى ەرلەر جانە قىزدار قاتىسىپ, تارتىستى ويىن ورنەگىن كورسەتتى. جارىس رەتتەلمەلى-اينالمالى جۇيەمەن بليتس بويىنشا ءوتتى. ويىن شارتى بويىنشا ءار ويىنشى 5 مينۋت +2 سەكۋند ىشىندە قازانىنا 82 قۇمالاق جيناپ الۋى كەرەك.
– توعىزقۇمالاق ويىنى ادامدى تەز شەشىم قابىلداۋعا, ۇشقىر ويلاۋعا, جۇيرىك ەسەپتەۋگە كومەكتەسەدى. ويىن وتە قىزىقتى ءارى تارتىستى بولدى. جۇزدەن جۇيرىك شىعۋ ءۇشىن ۋاقىت پەن سانانى ءتيىمدى پايدالانۋعا تىرىستىق. جالپى وڭىردە ۇلتتىق ويىن قوعامدىق ورىندا اشىق چەمپيونات رەتىندە ۇيىمداستىرىلعانى قۋانتىپ تۇر. جوبا جالعاسىن تابا بەرسىن, – دەيدى قاتىسۋشى فاريدا نوۆرۋزباەۆا.
اشىق چەمپيونات قورىتىندىسى بويىنشا 15-25 جاس ارالىعىنداعى ۇلدار اراسىندا باقىتجان ماناش 1-ورىنعا يە بولدى. 2-ورىندى تۇراقباي جۇماكەلدى السا, 3-ورىندى دامير دوسىمجان ۇلى قانجىعاعا بايلادى.
ال 25-35 جاستاعى ەرلەر اراسىندا ابىلاي قارابالاەۆ توپ جارىپ, 1-ورىن الدى. 2-ورىنعا پاراحات دجۋنەباەۆ, 3-ورىنعا تۇگەلباي ماحسەتوۆيچ يە بولدى. سونىمەن قاتار ۇزدىك ويىن كورسەتكەن
نۇرسۇلتان وراقوۆ, دىنمۇحاممەد بايمبەتوۆ, عابيت وسكىنباەۆ العىس حاتپەن ماراپاتتالدى.
15-25 جاس ارالىعىنداعى قىزدار اراسىندا 1-ورىندى فاريدا نوۆرۋزباەۆا يەلەندى. 2-ورىنعا ناعيما ايلادەر يە بولدى. 3-ورىندى رايحان قايرات الدى. ال ايگەرىم قوسۋمباەۆا العىس حاتپەن ماراپاتتالدى.
25-35 جاستاعى قىزدار اراسىندا مەيرامگۇل نازارباەۆا توپ جاردى. جۇلدەلى 2-ورىنعا اقسانا جۇماباەۆا يە بولدى. 3-ورىندى نازگۇل قايىرعاليەۆا يەلەندى. ويىندا بەلسەندىلىك تانىتقان
ايگەرىم تۋلەپوۆا العىس حات الدى.
جەڭىمپازداردى وبلىستىق جاستار ساياساتى ماسەلەلەرى جونىندەگى باسقارماسىنىڭ باسشىسى مۇقاش ورالباي قۇتتىقتاپ, تۇرمىستىق-تەحنيكالىق دۇكەنگە 100 مىڭ تەڭگە, 50 مىڭ تەڭگە جانە 30 مىڭ تەڭگەلىك سەرتيفيكاتتار مەن مەدال تابىستادى.
