Aqtaýda toǵyzqumalaqtan oblystyq ashyq chempıonat ótti

6 tamyz kúni teńiz jaǵalaýynda «Ulttyq qundylyq – ulttyń qazynasy» jobasy aıasynda toǵyzqumalaqtan oblystyq ashyq chempıonat ótti. Chempıonattyń maqsaty – jastar arasynda ulttyq oıyndy nasıhattap, buqaralyq sıpatyn arttyrý.

Sharany «Jeti jurt» qoǵamdyq birlestigi oblystyq jastar saıasaty máseleleri jónindegi basqarmasynyń tapsyrysymen, Azamattyq bastamalardy qoldaý ortalyǵynyń qoldaýymen ótkizedi.

Ashyq chempıonatqa óńirdegi 15-25 jasqa deıingi jáne 25-35 jasqa deıingi erler jáne qyzdar qatysyp, tartysty oıyn órnegin kórsetti. Jarys rettelmeli-aınalmaly júıemen blı boıynsha ótti. Oıyn sharty boıynsha ár oıynshy 5 mınýt +2 sekýnd ishinde qazanyna 82 qumalaq jınap alýy kerek.

– Toǵyzqumalaq oıyny adamdy tez sheshim qabyldaýǵa, ushqyr oılaýǵa, júırik esepteýge kómektesedi. Oıyn óte qyzyqty ári tartysty boldy. Júzden júırik shyǵý úshin ýaqyt pen sanany tıimdi paıdalanýǵa tyrystyq. Jalpy óńirde ulttyq oıyn qoǵamdyq orynda ashyq chempıonat retinde uıymdastyrylǵany qýantyp tur. Joba jalǵasyn taba bersin, – deıdi qatysýshy Farıda Novrýzbaeva.

Ashyq chempıonat qorytyndysy boıynsha 15-25 jas aralyǵyndaǵy uldar arasynda Baqytjan Manash 1-orynǵa ıe boldy. 2-oryndy Turaqbaı Jumakeldi alsa, 3-oryndy Damır Dosymjanuly qanjyǵaǵa baılady.

Al 25-35 jastaǵy erler arasynda Abylaı Qarabalaev top jaryp, 1-oryn aldy. 2-orynǵa Parahat Djýnebaev, 3-orynǵa Túgelbaı Mahsetovıch ıe boldy. Sonymen qatar úzdik oıyn kórsetken
Nursultan Oraqov, Dinmuhammed Baımbetov, Ǵabıt О́skinbaev alǵys hatpen marapattaldy.

15-25 jas aralyǵyndaǵy qyzdar arasynda 1-oryndy Farıda Novrýzbaeva ıelendi. 2-orynǵa Naǵıma Aılader ıe boldy. 3-oryndy Raıhan Qaırat aldy. Al Áıgerim Qosýmbaeva alǵys hatpen marapattaldy.

25-35 jastaǵy qyzdar arasynda Meıramgúl Nazarbaeva top jardy. Júldeli 2-orynǵa Aqsana Jumabaeva ıe boldy. 3-oryndy Nazgúl Qaıyrǵalıeva ıelendi. Oıynda belsendilik tanytqan
Áıgerim Týlepova alǵys hat aldy.

Jeńimpazdardy oblystyq jastar saıasaty máseleleri jónindegi basqarmasynyń basshysy Muqash Oralbaı quttyqtap, turmystyq-tehnıkalyq dúkenge 100 myń teńge, 50 myń teńge jáne 30 myń teńgelik sertıfıkattar men medal tabystady.