جاڭالىقتار
اقتاۋداعى تراگەديا: اپات الدىنداعى ۇشقىشتاردىڭ ديالوگى جاريالاندى
فوتو: اشىق دەرەككوز
شامامەن ساعات 05:15-تە ۇشقىشتار جەردەگى ديسپەتچەرلەرمەن شۇعىل بايلانىسقا شىعادى. اۋەلدە ولار «ەكى رەت دۇڭك ەتكەن قاتتى سوققى سەزىلدى, شاماسى ۇشاققا قۇستار سوعىلعان بولۋى كەرەك…» ويلاپ قالعان. ارتىنشا ەڭ جاقىن ماڭداعى اۋەجايعا قونۋعا رۇقسات سۇراعان, دەپ جازادى qandastar.kz
سول ەكى ورتادا ۇشاقتىڭ باسقارۋعا «باعىنباي» جاتقانىن, گيدراۆليكانىڭ ىستەن شىققانىن دا ەسكەرتىپ ۇلگەرگەن.
ەكيپاج ۇشاقتى مينەرالدى سۋلارعا (رەسەيدەگى قالا) قوندىرۋعا وقتالعانمەن, ونداعى اۋا رايى جايسىز بولادى. ماحاچقالا مەن باكۋدەگى جاعداي دا وسىعان ۇقساس ەكەنى انىقتالادى. اقىرى اۋا رايى جاعىنان دا, اۋەايلاق دايىندىعى جاعىنان دا قولايلىسى اقتاۋ بولعان سوڭ, سوندا بەت بۇرادى. سالدەن سوڭ كاپيتان جولاۋشىلار كابيناسىنداعى وتتەگىنىڭ تاۋسىلۋعا تاياپ قالعانىن حابارلاپ, «بالكىم وتتەگى باللوندارىنىڭ ءبىرى جارىلعان بولار» دەگەن ۇيعارىمعا كەلەدى. سالونداعى ادامدارعا اۋا جەتپەي, ەسىنەن تانا باستاعانىن كورگەندە ەكيپاجدىڭ ءوزى دە قاتتى ابىرجىعان.
06:02-دە ۇشقىشتار «Mayday» دابىلىن قوسىپ, دەرەۋ قونۋعا رۇقسات سۇرايدى, ءارى ۇشاقتىڭ باسقارۋ تەتىكتەرى مۇلدەم ىستەن شىققانىن ايتىپ ۇلگەرەدى. بۇل "قارا جاشىكتە" ساقتالعان ۇشقىشتاردىڭ سوڭعى ءسوزى… وسىدان كەيىن, 06:22 شاماسىندا ەكيپاج ءشاسسيدى شىعارىپ, قونۋعا دايىندالۋعا كىرىسەدى. 06:27-دە ۇشاق اپاتقا ۇشىرايدى. اپاتتان ءۇش ەكيپاج مۇشەسى مەن 35 جولاۋشى وپات بولدى. بۇعان دەيىن اشكەرە اقتاۋداعى اپاتقا سىرتقى فاكتور اسەر ەتكەنىن, ۇشاقتان شىعۋ تەگى بەلگىسىز بوگدە زاتتار تابىلعانىن حابارلاعان بولاتىن.
