Aqtaýdaǵy tragedııa: Apat aldyndaǵy ushqyshtardyń dıalogy jarııalandy

Foto: ashyq derekkóz

Shamamen saǵat 05:15-te ushqyshtar jerdegi dıspetcherlermen shuǵyl baılanysqa shyǵady. Áýelde olar «eki ret dúńk etken qatty soqqy sezildi, shamasy ushaqqa qustar soǵylǵan bolýy kerek…» oılap qalǵan. Artynsha eń jaqyn mańdaǵy áýejaıǵa qonýǵa ruqsat suraǵan, dep jazady qandastar.kz

Ekıpaj ushaqty Mıneraldy sýlarǵa (Reseıdegi qala) qondyrýǵa oqtalǵanmen, ondaǵy aýa raıy jaısyz bolady. Mahachqala men Bakýdegi jaǵdaı da osyǵan uqsas ekeni anyqtalady. Aqyry aýa raıy jaǵynan da, áýeaılaq daıyndyǵy jaǵynan da qolaılysy Aqtaý bolǵan soń, sonda bet burady. Sálden soń kapıtan jolaýshylar kabınasyndaǵy otteginiń taýsylýǵa taıap qalǵanyn habarlap, «bálkim ottegi ballondarynyń biri jarylǵan bolar» degen uıǵarymǵa keledi. Salondaǵy adamdarǵa aýa jetpeı, esinen tana bastaǵanyn kórgende ekıpajdyń ózi de qatty abyrjyǵan.

06:02-de ushqyshtar «Mayday» dabylyn qosyp, dereý qonýǵa ruqsat suraıdy, ári ushaqtyń basqarý tetikteri múldem isten shyqqanyn aıtyp úlgeredi. Bul "qara jáshikte" saqtalǵan ushqyshtardyń sońǵy sózi… Osydan keıin, 06:22 shamasynda ekıpaj shassıdi shyǵaryp, qonýǵa daıyndalýǵa kirisedi. 06:27-de ushaq apatqa ushyraıdy. Apattan úsh ekıpaj múshesi men 35 jolaýshy opat boldy. Buǵan deıin Áshkere Aqtaýdaǵy apatqa syrtqy faktor áser etkenin, ushaqtan shyǵý tegi belgisiz bógde zattar tabylǵanyn habarlaǵan bolatyn.