اقتاۋداعى ۇشاق اپاتى: قازا تاپقان ستيۋاردەسسانىڭ وتباسىن الاياقتار توناپ كەتتى

فوتو: ازاتتىق رۋحى

الاياقتار اقتاۋ ماڭىندا ۇشاق اپاتىنان قازا تاپقان Azerbaijan Airlines اۋە كومپانياسىنىڭ ستيۋاردەسساسى حوكۋما اليەۆانىڭ وتباسىنىڭ بانك كارتاسىنان 80 507 مانات اقشا ۇرلاپ كەتكەن, دەپ حابارلايدى qandastar.kz Ulysmedia.kz-كە سىلتەمە جاساپ.

انىق-قانىق

مارقۇم ستيۋاردەسسانىڭ اكەسى كيبەرقىلمىسپەن كۇرەس باس باسقارماسىنا ارىزدانعان. الاياقتار 80 507 مانات, ياعني 25 ميلليون تەڭگەدەن استام اقشانى جىمقىرعان.

اكەسىنىڭ ايتۋىنشا, ۇرلانعان قاراجات حوكۋما اليەۆانىڭ قايتىس بولۋىنا بايلانىستى ساقتاندىرۋ تولەمى مەن وتەماقىدان قالعان اقشا.

ايتۋلارىنشا, الاياق ءوزىن «Kapital Bank» قىزمەتكەرىمىن دەپ تانىستىرىپ, ستيۋاردەسسانىڭ اتا-اناسىن كارتانىڭ دەرەكتەمەلەرىن بەرۋگە كوندىرگەن.

ءىىم جاۋابى

ازەربايجان ىشكى ىستەر مينيسترلىگىنىڭ كيبەرقىلمىسپەن كۇرەس جونىندەگى باس باسقارماسى حوكۋما اليەۆانىڭ وتباسىنان ۇرلانعان اقشانىڭ قايتارىلعانىن حابارلادى.

اتالعان فاكتى بويىنشا قىلمىستىق ءىس قوزعالىپ, كۇدىكتىلەر انىقتالدى.

اقتاۋ ماڭىنداعى اپات

25 جەلتوقسان كۇنى اقتاۋ قالاسىنىڭ ماڭىندا Azerbaijan Airlines اۋەكومپانياسىنىڭ باكۋدەن گروزنىيعا باعىت العان جولاۋشىلار ۇشاعى اپاتقا ۇشىراپ, 38 ادام قازا تاپتى.

بورتتا 5 ەكيپاج مۇشەسىن قوسا العاندا 67 ادام بولعان. جولاۋشىلاردىڭ 6-اۋى قازاقستان, 42-ءسى ازەربايجان, 3-ەۋى قىرعىزستان, 16-سى رەسەي ازاماتى.29 ادام جاراقات الىپ, اۋرۋحاناعا جاتقىزىلدى, ولاردىڭ اراسىندا ەكى بالا بار. اپاتتان امان قالعاندار اراسىندا قازاقستاندىقتار جوق.

توتەنشە جاعدايلار مينيسترلىگى اقتاۋ ماڭىنداعى ۇشاق اپاتى كەزىندە قازا تاپقان قازاقستاندىقتاردىڭ ءتىزىمىن جاريالادى.

ۇشاق اپاتىنا بايلانىستى قىلمىستىق ءىس اشىلىپ, قايعىلى وقيعانىڭ سەبەپ-سالدارىن تەكسەرۋ ءۇشىن ۇكىمەتتىك كوميسسيا قۇرىلدى.

25 جەلتوقساندا اپاتقا ۇشىراعان اۋە كەمەسىنىڭ قارا جاشىگى تابىلدى. ال 26 جەلتوقساندا ماڭعىستاۋ وبلىسىنىڭ كولىكتەگى پروكۋرورى ابىلايبەك ورداباەۆ ۇشاق قۇلاعان جەردەن تاعى ءبىر «قارا جاشىك» تابىلعانىن ايتتى.