Aqtaýdaǵy ushaq apaty: qaza tapqan stıýardessanyń otbasyn alaıaqtar tonap ketti

Foto: Azattyq rýhy

Alaıaqtar Aqtaý mańynda ushaq apatynan qaza tapqan Azerbaijan Airlines áýe kompanııasynyń stıýardessasy Hokýma Alıevanyń otbasynyń bank kartasynan 80 507 manat aqsha urlap ketken, dep habarlaıdy qandastar.kz Ulysmedia.kz-ke silteme jasap.

ANYQ-QANYQ

Marqum stıýardessanyń ákesi Kıberqylmyspen kúres bas basqarmasyna aryzdanǵan. Alaıaqtar 80 507 manat, ıaǵnı 25 mıllıon teńgeden astam aqshany jymqyrǵan.

Ákesiniń aıtýynsha, urlanǵan qarajat Hokýma Alıevanyń qaıtys bolýyna baılanysty saqtandyrý tólemi men ótemaqydan qalǵan aqsha.

Aıtýlarynsha, alaıaq ózin «Kapital Bank» qyzmetkerimin dep tanystyryp, stıýardessanyń ata-anasyn kartanyń derektemelerin berýge kóndirgen.

IIM JAÝABY

Ázerbaıjan Ishki ister mınıstrliginiń Kıberqylmyspen kúres jónindegi bas basqarmasy Hokýma Alıevanyń otbasynan urlanǵan aqshanyń qaıtarylǵanyn habarlady.

Atalǵan fakti boıynsha qylmystyq is qozǵalyp, kúdiktiler anyqtaldy.

AQTAÝ MAŃYNDAǴY APAT

25 jeltoqsan kúni Aqtaý qalasynyń mańynda Azerbaijan Airlines áýekompanııasynyń Bakýden Groznyıǵa baǵyt alǵan jolaýshylar ushaǵy apatqa ushyrap, 38 adam qaza tapty.

Bortta 5 ekıpaj múshesin qosa alǵanda 67 adam bolǵan. Jolaýshylardyń 6-aýy Qazaqstan, 42-si Ázerbaıjan, 3-eýi Qyrǵyzstan, 16-sy Reseı azamaty.29 adam jaraqat alyp, aýrýhanaǵa jatqyzyldy, olardyń arasynda eki bala bar. Apattan aman qalǵandar arasynda qazaqstandyqtar joq.

Tótenshe jaǵdaılar mınıstrligi Aqtaý mańyndaǵy ushaq apaty kezinde qaza tapqan qazaqstandyqtardyń tizimin jarııalady.

Ushaq apatyna baılanysty qylmystyq is ashylyp, qaıǵyly oqıǵanyń sebep-saldaryn tekserý úshin Úkimettik komıssııa quryldy.

25 jeltoqsanda apatqa ushyraǵan áýe kemesiniń qara jáshigi tabyldy. Al 26 jeltoqsanda Mańǵystaý oblysynyń kóliktegi prokýrory Abylaıbek Ordabaev ushaq qulaǵan jerden taǵy bir «qara jáshik» tabylǵanyn aıtty.