اقتاۋداعى ۇشاق اپاتى: پۋتين اليەۆتەن كەشىرىم سۇرادى

فوتو: Pixabay

اڭگىمە بارىسىندا كەستە بويىنشا ۇشاتىن ءازىربايجاننىڭ جولاۋشىلار ۇشاعى گروزنىي اۋەجايىنا بىرنەشە رەت قونۋعا ارەكەتتەنگەنى ايتىلدى.
ۆلاديمير پۋتين يلحام اليەۆكە حابارلاسىپ, 25 جەلتوقساندا اقتاۋ ماڭىندا ءازىربايجان اۋە جولدارىنىڭ جولاۋشىلار ۇشاعىنىڭ اپاتقا ۇشىراۋىنا بايلانىستى كەشىرىم سۇرادى, دەپ حابارلايدى qandastar.kz اقپارات پورتالى.

بۇل تۋرالى كرەملدىڭ ءباسپاسوز قىزمەتى مالىمدەدى.

«ۆلاديمير پۋتين قايعىلى وقيعانىڭ رەسەي اۋە كەڭىستىگىندە ورىن العانى ءۇشىن كەشىرىم سۇراپ, قازا بولعانداردىڭ وتباسىلارىنا كوڭىل ايتتى جانە زارداپ شەككەندەردىڭ تەزىرەك ساۋىعىپ كەتۋىن تىلەدى. اڭگىمە بارىسىندا كەستە بويىنشا ۇشاتىن ءازىربايجاننىڭ جولاۋشىلار ۇشاعى گروزنىي اۋەجايىنا بىرنەشە رەت قونۋعا ارەكەتتەنگەنى ايتىلدى. بۇل كەزدە گروزنىي, موزدوك جانە ۆلاديكاۆكاز قالالارى ۋكراينالىق اسكەري درون اپپاراتتاردىڭ شابۋىلىنا ۇشىرادى, ال رەسەيلىك اۋە قورعانىس جۇيەلەرى بۇل شابۋىلدارعا تويتارىس بەردى», – دەلىنگەن حابارلامادا.

قازىرگى كەزدە رەسەيدىڭ تەرگەۋ كوميتەتى “جول قوزعالىسى جانە اۋە كولىگىن پايدالانۋ قاۋىپسىزدىگى ەرەجەلەرىن بۇزۋ” بابى بويىنشا قىلمىستىق ءىس قوزعاعانى حابارلاندى. العاشقى تەرگەۋ ارەكەتتەرى جۇرگىزىلىپ, ازاماتتىق جانە اسكەري مامانداردان جاۋاپ الىنۋدا.

قازىر ءازىربايجان باس پروكۋراتۋراسىنىڭ ەكى قىزمەتكەرى گروزنىيدا ءجۇر, ولار رەسەيدىڭ باس پروكۋراتۋراسى مەن تەرگەۋ كوميتەتىنىڭ وكىلدەرىمەن بىرلەسە جۇمىس ىستەۋدە. اقتاۋداعى اپات ورنىندا رەسەي, ءازىربايجان جانە قازاقستاننىڭ ءتيىستى قىزمەتتەرى تىعىز ىنتىماقتاستىقتا جۇمىس ىستەپ جاتقانى ايتىلعان.

ەسكە سالساق, 25 جەلتوقساندا ءازىربايجان اۋە جولدارى كومپانياسىنا تيەسىلى Embraer E190AR ۇشاعى اقتاۋ قالاسىنداعى اۋەجاي ماڭىندا اپاتقا ۇشىراعان. سالدارىنان 38 ادام قازا تاپتى, 29 ادام ءتىرى قالدى. Euronews, Reuters سياقتى الەمدىك باسىلىمداردا اقتاۋداعى ۇشاق اپاتىنا رەسەيلىك زىمىران اسەر ەتكەنى تۋرالى جازىلدى.