Aqtaýdaǵy ushaq apaty: Pýtın Álıevten keshirim surady

Foto: Pixabay

Áńgime barysynda keste boıynsha ushatyn Ázirbaıjannyń jolaýshylar ushaǵy Groznyı áýejaıyna birneshe ret qonýǵa árekettengeni aıtyldy.
Vladımır Pýtın Ilham Álıevke habarlasyp, 25 jeltoqsanda Aqtaý mańynda Ázirbaıjan áýe joldarynyń jolaýshylar ushaǵynyń apatqa ushyraýyna baılanysty keshirim surady, dep habarlaıdy qandastar.kz aqparat portaly.

Bul týraly Kremldiń baspasóz qyzmeti málimdedi.

«Vladımır Pýtın qaıǵyly oqıǵanyń Reseı áýe keńistiginde oryn alǵany úshin keshirim surap, qaza bolǵandardyń otbasylaryna kóńil aıtty jáne zardap shekkenderdiń tezirek saýyǵyp ketýin tiledi. Áńgime barysynda keste boıynsha ushatyn Ázirbaıjannyń jolaýshylar ushaǵy Groznyı áýejaıyna birneshe ret qonýǵa árekettengeni aıtyldy. Bul kezde Groznyı, Mozdok jáne Vladıkavkaz qalalary ýkraınalyq áskerı dron apparattardyń shabýylyna ushyrady, al reseılik áýe qorǵanys júıeleri bul shabýyldarǵa toıtarys berdi», – delingen habarlamada.

Qazirgi kezde Reseıdiń tergeý komıteti “jol qozǵalysy jáne áýe kóligin paıdalaný qaýipsizdigi erejelerin buzý” baby boıynsha qylmystyq is qozǵaǵany habarlandy. Alǵashqy tergeý áreketteri júrgizilip, azamattyq jáne áskerı mamandardan jaýap alynýda.

Qazir Ázirbaıjan bas prokýratýrasynyń eki qyzmetkeri Groznyıda júr, olar Reseıdiń bas prokýratýrasy men tergeý komıtetiniń ókilderimen birlese jumys isteýde. Aqtaýdaǵy apat ornynda Reseı, Ázirbaıjan jáne Qazaqstannyń tıisti qyzmetteri tyǵyz yntymaqtastyqta jumys istep jatqany aıtylǵan.

Eske salsaq, 25 jeltoqsanda Ázirbaıjan áýe joldary kompanııasyna tıesili Embraer E190AR ushaǵy Aqtaý qalasyndaǵy áýejaı mańynda apatqa ushyraǵan. Saldarynan 38 adam qaza tapty, 29 adam tiri qaldy. Euronews, Reuters sııaqty álemdik basylymdarda Aqtaýdaǵy ushaq apatyna reseılik zymyran áser etkeni týraly jazyldy.