Aqtaýdaǵy ushaq apatynda qaza bolǵan qazaqstandyqtardyń esimi ataldy

Foto: ashyq derekkóz

Aqtaýdaǵy ushaq apatynan mert bolǵan qazaqstandyqtar týraly aqparat belgili boldy. Ishinde ana men bala da bar. Bul týraly qandastar.kz habarlady.

Stan.kz aqparat agenttigi jazǵandaı, qutqarý qyzmeti ushaq apaty kezinde qaza bolǵan Qazaqstan azamattary týraly aqparat berdi. Kóbi Mańǵystaý oblysynan eken.

• 36 jastaǵy Sándibek Tólesinov – Mańǵystaý oblysy, Jańaózen qalasynyń turǵyny;
• 39 jastaǵy Baýyrjan Jumaǵulov – Mańǵystaý oblysy, Jańaózen qalasynyń turǵyny;
• 46 jastaǵy Galına Mahsýdova – Aqtaý qalasynyń turǵyny;
• 49 jastaǵy Gaýhar Shaımerdenova – Astana qalasynyń turǵyny, biraq Almatyda dúnıege kelgen.
• 11 jasar Eldar Jumaǵat – Astana turǵyny. Gaýhar Shaımerdenovanyń uly.
• 29 jastaǵy Salıma Djýtaeva Amanjolqyzy – Qaraǵandy qalasynyń turǵyny.

Jelide qaza bolǵandar týraly aqparat tarady. Máselen Gaýhar Shaımerdenova Astanada notarıýs bolǵan eken. Telejúrgizýshi Sandı Sultan Gaýhar Shaımerdenovanyń ushaqta bolǵanyn habarlady. Jýrnalıst olardyń dos ekenin jáne ol 10 jasar uly Eldarmen birge Bakýden ushqanyn aıtty.

Al Salıma Djýtaeva Qaraǵandyda stomatolog bolyp jumys istegeni belgili boldy.

Eske salsaq, Aqtaý mańynda Bakýden Groznyıǵa ushyp bara jatqan «Azerbaijan Airlines» áýe kompanııasyna tıesili jolaýshylar ushaǵy qulaǵany týraly jazǵan edik. Jelide ushaqtyń ishinde apatqa deıin jáne keıin túsirilgen vıdeolar paıda boldy.

Aıta keteıik, Aqtaý mańyndaǵy ushaq apatynan 38 adam qaza tapqany belgili boldy. Ushaqtaǵy qazaqstandyqtardyń barlyǵy kóz jumdy.