«اكتەر جان بايجانباەۆ جارنامالاعان»: الماتىلىق انا قىزىنىڭ كينوعا ءتۇسۋى ءۇشىن كاستينگ كومپانياسى 1,5 ملن تەڭگە نەسيە الدىرتۋعا ماجبۇرلەگەنىن ايتتى

فوتو: ۆيدەودان سكرين

الماتىلىق انا ۇلپان قۋانىشباي قىزى ەكەۋى بارعان كينو كاستينگى كەزىندە كۇتپەگەن جايتقا كۋا بولدى. ايتۋىنشا, ءىس-شارادا بالالار مەن اتا-انالارعا «وسكار» مۇسىنشەسى, ليمۋزين, قىزىل كىلەم ۋادە ەتىلىپ, 1,5 ميلليون تەڭگەگە كەلىسىم جاساۋعا ۇگىتتەگەن, دەپ جازدى qandastar.kz

ال اتالعان كاستينگتىڭ جارناماسىنا بەلگىلى اكتەر جان بايجانباەۆتىڭ ءوزى تۇسكەن ەكەن. ءمان-جايدى ءبىلۋ ءۇشىن Stan.kz ءتىلشىسى اكتەردىڭ وزىنە حابارلاستى.

“وسىنىڭ ءبارى ءۇشىن 1,5 ميلليون تەڭگە تولەۋىمدى سۇرادى”

ۇلپان قۋانىشبايدىڭ 15 جاستاعى بويجەتكەنى بىرنەشە جىلدان بەرى «يگرا» اكتەرلىك مەكتەبىندە وقيدى. ول قىزىنىڭ اكتريسا بولۋ تۋرالى ارمانىن جاقسى بىلەدى. جاقىندا قىزى جان بايجانباەۆپەن بىرگە كينوعا تۇسۋگە ارنالعان كاستينگتىڭ جارناماسىن كورىپ, قاتتى قۋانعان. كاستينگكە اتا-انانىڭ قاتىسۋى مىندەتتى بولعاندىقتان, قىزى اناسىن ەرتىپ بارعان.

اناسىنىڭ ايتۋىنشا, كەلگەن جەردە ۇزىن-سونار كەزەك بولعان, ءارتۇرلى جاستاعى بالالار اتا-انالارىمەن بىرگە جۇرگەن.

«كاستينگكە كەلگەندە باستى رولگە ىزدەۋ كريتەريلەرى تىم جالپىلاما ەكەنىنە تاڭعالدىم. «7-دەن 17 جاسقا دەيىنگى بالالار» دەپ جازىلعان. مىسالى, ادەتتە, بىرەۋدى 12-13 جاستاعى ازيالىق قىز دەپ ناقتى ىزدەيدى. ال مۇندا جاس تا, جىنىس تا, ۇلت تا ماڭىزدى ەمەس سياقتى», – دەدى اتا-انا ۇلپان قۋانىشباي.

كەزەك كەلگەن سوڭ قىزىن كاستينگكە شاقىرىپ, ءوزىن ەدگار ەسىمدى مەنەدجەرگە اپارعان.

«سول مەنەدجەر ماعان قىزىمنىڭ باستى رولىندە تۇسەتىن 30 مينۋتتىق قىسقا فيلم تۇسىرەتىندەرىن, كەيىن جابىق كورسەتىلىم ۇيىمداستىراتىنىن, قىزىم ليمۋزينمەن, كەشكى كويلەكپەن, شاش ۇلگىسىمەن كەلەتىنىن, قىزىل كىلەممەن جۇرەتىنىن… ءارى وعان «وسكاردىڭ» كوشىرمە مۇسىنشەسىن تابىستايتىندارىن ادەمىلەپ سۋرەتتەپ ايتىپ بەردى. وسىنىڭ ءبارى ءۇشىن 1,5 ميلليون تەڭگە تولەۋىمدى سۇرادى. مەن ويلانىپ, كۇيەۋىممەن اقىلداسايىن دەسەم, “سىزدە ويلانۋعا ۋاقىت جوق, ءدال قازىر شەشىم قابىلداۋىڭىز كەرەك” دەدى. ءتىپتى ء“بىر ساعات تا جوق” دەپ قاسارىستى. سول كەزدە كۇدىگىم كۇشەيدى, بۇل كادىمگى الاياقتىققا ۇقسايدى», – دەپ شاعىمداندى ۇلپان قۋانىشباي.

اناسىنىڭ ايتۋىنشا, تۇسۋگە نيەتتىلەر ء«بىر ۆاگون», ال ەگەر كەلىسىمىن بەرسە, ولار ونىڭ قىزىن تاڭداپ, كاستينگتى توقتاتادى ەكەن.

«وسى ساتتە قىزىمنىڭ كاستينگىن وتكىزگەن ادام “قۋانىشپەن” كىرىپ كەلىپ, قىزىمنىڭ باستى رولگە تولىق سايكەس كەلەتىنىن, ناعىز تالانتى بارىن جانە ولار وسىنداي اكتريسانى كوپتەن بەرى ىزدەپ جۇرگەندەرىن ايتادى. مەن تاعى دا ءدال قازىر جاۋاپ بەرمەيتىنىمدى, ماعان ويلانۋعا ۋاقىت كەرەك ەكەنىن ايتامىن. سوندا ولار تۋرا سۇرايدى «ايتىڭىزشى, ءسىز اي سايىن قىزىڭىزعا قانشا اقشا جۇمسايسىز?» مەن ولارعا مۇنىڭ ءوز ىستەرى ەمەس ەكەنىن سىپايى تۇردە بىلدىرەمىن. ال ولار بولسا, ەگەر مەن 24 ايعا Kaspi-دەن ءبولىپ تولەۋ راسىمدەسەم, ايىنا “بار بولعانى” 60 مىڭ تەڭگە تولەيتىنىمدى ايتادى. سول كەزدە ماعان بۇل ناعىز الاياقتار ەكەنى انىق بولا باستادى», – دەدى ۇلپان قۋانىشباي.

ايەل قوشتاسىپ, كەتۋگە وقتالادى, بىراق ولار كابينەتكە ونىڭ قىزىن شاقىرىپ, ليمۋزين, قىزىل كىلەم, «وسكار» تۋرالى اڭگىمەلەرمەن ارباي باستايدى. بۇل اشىق مانيپۋلياتسيا ونىڭ اشۋىن تۋدىرادى. ول قىزىنا كەتەتىندەرىن ايتادى, الايدا ولار ء«سىز بىزگە ەمەس, قىزىڭىزعا قارسى شىعىپ وتىرسىز» دەپ جاۋاپ بەرەدى. ال قىزىنا «قاراشى, اناڭ سەنى قولدامايدى» دەپ قارسى شىعارعان.

«بۇل مەنى مۇلدە اشۋلاندىردى. ورنىمنان تۇرىپ, شىعىپ كەتەمىن, بىراق قىزىم كوز جاسىنا ەرىك بەرىپ, ارتىمنان شىقپاي قالادى. دارمەنسىزدەنىپ, ونى دەرلىك كۇشپەن سىرتقا شىعارامىن دا, بۇل الاياقتار ەكەنىن تۇسىندىرەمىن. ەڭ جاقسى جاعدايدا ولار ءبىر قوقىسقا تاتيتىن قىسقا مەتراجدى فيلم تۇسىرەدى, ونى ەشكىم, ەشقاشان كورمەيدى. ال بۇل ماعان 1,5 ميلليون تەڭگەگە تۇسەدى. ەڭ جامانى 1,5 ميلليوندى الىپ, مۇلدە تايىپ تۇرۋى مۇمكىن. بىراق وسى وقيعانىڭ ەڭ باستى سۇراعى, جان بايجانباەۆتىڭ جاعدايى سونشالىقتى ناشار ما, الدە ول وسىنداي كۇماندى سحەمالارعا قاتىساتىن دەڭگەيگە ءتۇستى مە? وسى جايىندا كىم نە بىلەدى, ەستىدى نەمەسە ويلايدى?» – دەپ جازدى ايەل جەلىدەگى پاراقشاسىندا.

“كەيبىر انالار كەلىسىپ, بالاسىن 1,5 ايلىق وقۋ كۋرسىنا جىبەرەدى”

ال كومپانيانىڭ جارناماسىنا تۇسكەن جان بايجانباەۆ مۇنداي جوبالارعا قاتىسۋعا نيەتتى انالار وتە كوپ ەكەنىن ايتتى. سوزىنشە, ول – كومپانيانىڭ امباسسادورى.

“ادەتتە, انالار بالاسىن تۇسىرىلىمگە اكەلگەندە, ولاردىڭ بالالارىنا كاستينگ سياقتى جوبالار ۇيىمداستىرىلادى. بۇل كوممەرتسيالىق جوبا, ياعني ءبارى اقىلى تۇردە جۇرەدى. ولار ستسەناريست جالدايدى, ستسەناريست تولىق ستسەناري جازادى, سودان كەيىن ءتۇسىرىلىم توبى جۇمىس ىستەيدى. ءبارى زاڭدى تۇردە راسىمدەلگەن. كەيبىر انالار كەلىسىپ, بالاسىن 1,5 ايلىق وقۋ كۋرسىنا جىبەرەدى, سودان كەيىن ءتۇسىرىلىم جۇرەدى. بۇل ءتۇسىرىلىم YouTube-ارناسىندا جاريالانادى. ەگەر اتا-انا تولەي الماسا, ول بالاسىن الداعى كەزەڭگە جىبەرمەۋىنە بولادى. بىراق تولەۋگە دايىن اتا-انالار دا بار. ونىڭ ۇستىنە, ولاردىڭ ۇلكەن كەڭسەلەرى دە بولعاندىقتان, ءبارى اقىلى”, – دەدى اكتەر جان بايجانباەۆ.

جان بايجانباەۆتىڭ ايتۋىنشا, مۇنى شامامەن جەكەمەنشىك قىمبات مەكتەپتەرمەن سالىستىرۋعا بولاتىنىن, الايدا باعاسى الدەقايدا ارزان ەكەنىن ءتۇسىندىردى.

«ۇيىمداستىرۋشىلىق جاعىنا كەلسەك, بۇل سۇراق تىكەلەي ولارعا, ياعني Jan Production كومپانياسىنا قويىلادى. مەن تەك پوست-امباسسادور رەتىندە جۇمىس ىستەيمىن جانە ءوزىم دە ولارمەن كينوعا ءتۇسىپ ءجۇرمىن. ولاردىڭ بارلىق قۇجاتى زاڭدى, «قازاقفيلممەن» كەلىسىمشارتتارى بار, بىرلەسىپ جۇمىس ىستەيدى. كومپانيانىڭ اتاۋىن مەنىڭ قۇرمەتىمە قويدى. انالار اراسىندا بالاسىنىڭ كينوعا تۇسكەنىن قالايتىندار كوپ. بىراق تەگىن تۇسىرگىسى كەلەتىندەر دە بار. دەگەنمەن ەگەر تەگىن ءتۇسىرۋ مۇمكىندىگى بولماسا, اتا-انالار اقىلى تۇردە كەلىسەدى. بۇل كادىمگى اكتەرلىك اگەنتتىك سياقتى: الدىمەن بالالاردى وقىتادى, سودان كەيىن كينوعا تۇسىرەدى», – دەدى جان بايجانباەۆ.

جان بايجانباەۆتىڭ ايتۋىنشا, كاستينگتىڭ ماقساتى – كينوعا تۇسۋگە قابىلەتى مەن ىنتاسى بار بالالاردى ىرىكتەۋ. كەيدە اتا-اناسى اقشا تولەۋگە دايىن بولسا دا, بالانىڭ قابىلەتى بولماسا المايدى. ويتكەنى ول رولگە جارامايدى نەمەسە بالانىڭ ءوزى مۇلدە قالامايدى. سول سەبەپتى ءبارىن بىردەي قابىلداماي, ىرىكتەۋدەن وتكەندەردى عانا الادى دەيدى اكتەر.