«Akter Jan Baıjanbaev jarnamalaǵan»: Almatylyq ana qyzynyń kınoǵa túsýi úshin kastıng kompanııasy 1,5 mln teńge nesıe aldyrtýǵa májbúrlegenin aıtty

Foto: Vıdeodan skrın

Almatylyq ana Ulpan Qýanyshbaı qyzy ekeýi barǵan kıno kastıngi kezinde kútpegen jaıtqa kýá boldy. Aıtýynsha, is-sharada balalar men ata-analarǵa «Oskar» músinshesi, lımýzın, qyzyl kilem ýáde etilip, 1,5 mıllıon teńgege kelisim jasaýǵa úgittegen, dep jazdy qandastar.kz

Al atalǵan kastıngtiń jarnamasyna belgili akter Jan Baıjanbaevtyń ózi túsken eken. Mán-jaıdy bilý úshin Stan.kz tilshisi akterdiń ózine habarlasty.

“Osynyń bári úshin 1,5 mıllıon teńge tóleýimdi surady”

Ulpan Qýanyshbaıdyń 15 jastaǵy boıjetkeni birneshe jyldan beri «Igra» akterlik mektebinde oqıdy. Ol qyzynyń aktrısa bolý týraly armanyn jaqsy biledi. Jaqynda qyzy Jan Baıjanbaevpen birge kınoǵa túsýge arnalǵan kastıngtiń jarnamasyn kórip, qatty qýanǵan. Kastıngke ata-ananyń qatysýy mindetti bolǵandyqtan, qyzy anasyn ertip barǵan.

Anasynyń aıtýynsha, kelgen jerde uzyn-sonar kezek bolǵan, ártúrli jastaǵy balalar ata-analarymen birge júrgen.

«Kastıngke kelgende basty rólge izdeý krıterııleri tym jalpylama ekenine tańǵaldym. «7-den 17 jasqa deıingi balalar» dep jazylǵan. Mysaly, ádette, bireýdi 12-13 jastaǵy azııalyq qyz dep naqty izdeıdi. Al munda jas ta, jynys ta, ult ta mańyzdy emes sııaqty», – dedi ata-ana Ulpan Qýanyshbaı.

Kezek kelgen soń qyzyn kastıngke shaqyryp, ózin Edgar esimdi menedjerge aparǵan.

«Sol menedjer maǵan qyzymnyń basty rólinde túsetin 30 mınýttyq qysqa fılm túsiretinderin, keıin jabyq kórsetilim uıymdastyratynyn, qyzym lımýzınmen, keshki kóılekpen, shash úlgisimen keletinin, qyzyl kilemmen júretinin… ári oǵan «Oskardyń» kóshirme músinshesin tabystaıtyndaryn ádemilep sýrettep aıtyp berdi. Osynyń bári úshin 1,5 mıllıon teńge tóleýimdi surady. Men oılanyp, kúıeýimmen aqyldasaıyn desem, “sizde oılanýǵa ýaqyt joq, dál qazir sheshim qabyldaýyńyz kerek” dedi. Tipti “bir saǵat ta joq” dep qasarysty. Sol kezde kúdigim kúsheıdi, bul kádimgi alaıaqtyqqa uqsaıdy», – dep shaǵymdandy Ulpan Qýanyshbaı.

Anasynyń aıtýynsha, túsýge nıettiler «bir vagon», al eger kelisimin berse, olar onyń qyzyn tańdap, kastıngti toqtatady eken.

«Osy sátte qyzymnyń kastıngin ótkizgen adam “qýanyshpen” kirip kelip, qyzymnyń basty rólge tolyq sáıkes keletinin, naǵyz talanty baryn jáne olar osyndaı aktrısany kópten beri izdep júrgenderin aıtady. Men taǵy da dál qazir jaýap bermeıtinimdi, maǵan oılanýǵa ýaqyt kerek ekenin aıtamyn. Sonda olar týra suraıdy «Aıtyńyzshy, siz aı saıyn qyzyńyzǵa qansha aqsha jumsaısyz?» Men olarǵa munyń óz isteri emes ekenin sypaıy túrde bildiremin. Al olar bolsa, eger men 24 aıǵa Kaspi-den bólip tóleý rásimdesem, aıyna “bar bolǵany” 60 myń teńge tóleıtinimdi aıtady. Sol kezde maǵan bul naǵyz alaıaqtar ekeni anyq bola bastady», – dedi Ulpan Qýanyshbaı.

Áıel qoshtasyp, ketýge oqtalady, biraq olar kabınetke onyń qyzyn shaqyryp, lımýzın, qyzyl kilem, «Oskar» týraly áńgimelermen arbaı bastaıdy. Bul ashyq manıpýlıaııa onyń ashýyn týdyrady. Ol qyzyna ketetinderin aıtady, alaıda olar «Siz bizge emes, qyzyńyzǵa qarsy shyǵyp otyrsyz» dep jaýap beredi. Al qyzyna «Qarashy, anań seni qoldamaıdy» dep qarsy shyǵarǵan.

«Bul meni múlde ashýlandyrdy. Ornymnan turyp, shyǵyp ketemin, biraq qyzym kóz jasyna erik berip, artymnan shyqpaı qalady. Dármensizdenip, ony derlik kúshpen syrtqa shyǵaramyn da, bul alaıaqtar ekenin túsindiremin. Eń jaqsy jaǵdaıda olar bir qoqysqa tatıtyn qysqa metrajdy fılm túsiredi, ony eshkim, eshqashan kórmeıdi. Al bul maǵan 1,5 mıllıon teńgege túsedi. Eń jamany 1,5 mıllıondy alyp, múlde taıyp turýy múmkin. Biraq osy oqıǵanyń eń basty suraǵy, Jan Baıjanbaevtyń jaǵdaıy sonshalyqty nashar ma, álde ol osyndaı kúmándi shemalarǵa qatysatyn deńgeıge tústi me? Osy jaıynda kim ne biledi, estidi nemese oılaıdy?» – dep jazdy áıel jelidegi paraqshasynda.

“Keıbir analar kelisip, balasyn 1,5 aılyq oqý kýrsyna jiberedi”

Al kompanııanyń jarnamasyna túsken Jan Baıjanbaev mundaı jobalarǵa qatysýǵa nıetti analar óte kóp ekenin aıtty. Sózinshe, ol – kompanııanyń ambassadory.

“Ádette, analar balasyn túsirilimge ákelgende, olardyń balalaryna kastıng sııaqty jobalar uıymdastyrylady. Bul kommerııalyq joba, ıaǵnı bári aqyly túrde júredi. Olar senarıst jaldaıdy, senarıst tolyq senarıı jazady, sodan keıin túsirilim toby jumys isteıdi. Bári zańdy túrde rásimdelgen. Keıbir analar kelisip, balasyn 1,5 aılyq oqý kýrsyna jiberedi, sodan keıin túsirilim júredi. Bul túsirilim YouTube-arnasynda jarııalanady. Eger ata-ana tóleı almasa, ol balasyn aldaǵy kezeńge jibermeýine bolady. Biraq tóleýge daıyn ata-analar da bar. Onyń ústine, olardyń úlken keńseleri de bolǵandyqtan, bári aqyly”, – dedi akter Jan Baıjanbaev.

Jan Baıjanbaevtyń aıtýynsha, muny shamamen jekemenshik qymbat mekteptermen salystyrýǵa bolatynyn, alaıda baǵasy áldeqaıda arzan ekenin túsindirdi.

«Uıymdastyrýshylyq jaǵyna kelsek, bul suraq tikeleı olarǵa, ıaǵnı Jan Production kompanııasyna qoıylady. Men tek post-ambassador retinde jumys isteımin jáne ózim de olarmen kınoǵa túsip júrmin. Olardyń barlyq qujaty zańdy, «Qazaqfılmmen» kelisimsharttary bar, birlesip jumys isteıdi. Kompanııanyń ataýyn meniń qurmetime qoıdy. Analar arasynda balasynyń kınoǵa túskenin qalaıtyndar kóp. Biraq tegin túsirgisi keletinder de bar. Degenmen eger tegin túsirý múmkindigi bolmasa, ata-analar aqyly túrde kelisedi. Bul kádimgi akterlik agenttik sııaqty: aldymen balalardy oqytady, sodan keıin kınoǵa túsiredi», – dedi Jan Baıjanbaev.

Jan Baıjanbaevtyń aıtýynsha, kastıngtiń maqsaty – kınoǵa túsýge qabileti men yntasy bar balalardy irikteý. Keıde ata-anasy aqsha tóleýge daıyn bolsa da, balanyń qabileti bolmasa almaıdy. О́ıtkeni ol rólge jaramaıdy nemese balanyń ózi múlde qalamaıdy. Sol sebepti bárin birdeı qabyldamaı, irikteýden ótkenderdi ǵana alady deıdi akter.