Aqtóbe oblysynda kásipkerler sýdan zardap shekkenderge kómektesip jatyr

Aqtóbe oblysynda tasqyn sýdan zardap shekkenderge kómektesip jatqan kásipker kóp.

Biri qıyn jaǵdaıda qalǵan turǵyndarǵa mal men egistik úshin arpa-bıdaı tuqymyn berem dese, endi biri baspanasynan aırylǵandarǵa óz aýylynan 10 úı usynyp otyr.

Jumys beremiz dep te ýáde berip jatyr. Orynbaı Jolmurat – jurtqa jaqsylyq jasaýdy ádetke aınaldyrǵan kásipkerlerdiń biri. Jıyrma jyl buryn sharýa qojalyǵyn ashyp, qoı, sıyr jáne jylqy ósirýdi qolǵa alǵan ol týǵan aýyly Aqtastyda kómekke muqtaj jerlesterin árdaıym qoldap keledi. Shalǵaıda jatqan eldi mekenge erigen qar sýy kelgende aýyldastarmen birge 10 kún damyl tappady. Qolda bar tehnıkalaryn da jumyldyrǵan. Aýyl shetinde áli mol sý bar.

Orynbaı Jolmurat, sharýa qojalyǵynyń basshysy: — 16 jasar balama deıin rýlge minip alyp, 4 shaqyrym sýdy, mynaý Tolybaı aýylynan bir aýrýlar (naýqas) keldi. Solardy bala bolsa da otyrǵyzyp amal joq tasyttym. Sondaı aýyr ýaqytta eldiń búkil azamaty kóterildi. Solardyń arqasynda toqtatty sýdy.

Tájirıbeli kásipker qarǵyn sýdan zardap shekken jandarǵa da kómek kórsetpek oıda. Al ózi aýyldaǵy bilim uıasyna qajet zattardy alyp berýge únemi qol ushyn sozyp keledi. Mekteptiń sport zaly men eńbek pánine qajetti qural-saımandardy da syıǵa tartqan. Endi, kólik alyp berý úshin jaýapty mekemelerge jıi baryp júr.  Sánııa Aıapova, Aqtasty orta mektebiniń dırektory: — Aýdan, oblys boıynsha, respýblıka boıynsha baıqaýlarǵa, saıystarǵa qatysýǵa múmkindikter bar. Biraq bizde qınalatyn jerimiz kólik bolmaıdy.

Sosyn bizde deıtin bilim jaǵynan qarasaq, baıqaýlar bolady. úzdik muǵalimder bolady, synyp jetekshileri bolady. Solarǵa da kómek retinde kerek. Tasqynnan zardap shekken turǵyndarǵa kómek kórsetem deýshiler óńirdiń ár óńirinen shyǵýda. Máselen, Qarǵaly aýdanynda egin egetin iri sharýashylyq qıyn jaǵdaıda qalǵandar úshin 200 qoı men 50 baspaq bóldi. Sondaı-aq, bıdaı men arpa tuqymdarynan 100 tonnadan bermek. Al alǵalyq kásipker Amangeldi aýylynan 10 otbasyna úı beretinin jetkizdi.