اقتوبە وبلىسىنداعى كەن بايىتۋ كومبيناتىندا اپات بولىپ, ەكى جۇمىسشى قازا تاپتى

فوتو: t.me/HromtauLIVE

اقتوبە وبلىسى حرومتاۋ اۋدانىندا ورنالاسقان ءدوڭ كەن-بايىتۋ كومبيناتىندا جۇك كولىگى اۋدارىلىپ كەتتى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

اپات سالدارىنان ەكى جۇمىسشى وقيعا ورنىندا قازا تاپتى.

«قازحروم» تۇك» اق فيليالى ءدوڭ تاۋ-كەن بايىتۋ كومبيناتىنداعى جول-كولىك وقيعاسى سالدارىنان كاسىپورىننىڭ ەكى قىزمەتكەرى كوز جۇمدى. وقيعا تۋرالى مەملەكەتتىك ورگاندارعا حابارلاندى. وقىس وقيعانىڭ ءمان-جايى انىقتالىپ جاتىر. كومپانيا مارقۇمداردىڭ وتباسىنا قاجەتتى كومەك كورسەتەدى”, – دەلىنگەن «قازحروم» كومپانياسىنىڭ حابارلاماسىندا.

الەۋمەتتىك جەلىدە كومبيناتتا بولعان جول اپاتىنىڭ ۆيدەوسى جاريالاندى. ۆيدەودان جۇك كولىگىنىڭ ۇلكەن جىلدامدىقپەن كەلە جاتىپ, اۋدارىلىپ كەتكەنىن كورۋگە بولادى.

اقتوبە وبلىستىق پوليتسيا دەپارتامەنتىنىڭ مالىمەتىنشە, جۇك كولىگىنىڭ جۇرگىزۋشىسى مەن جولاۋشى قازا تاپقان.

«تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ فاكتىسى بويىنشا سوتقا دەيىنگى تەرگەۋ باستالدى», – دەلىنگەن پوليتسيا حابارلاماسىندا.

اقتوبە وبلىستىق مەملەكەتتىك ەڭبەك ينسپەكتسياسى جونىندەگى دەپارتامەنتى وقيعانىڭ ءمان-جايىن انىقتاۋ ءۇشىن كوميسسيا قۇردى. تەكسەرۋ قورىتىندىسى بويىنشا جاۋاپتى تۇلعالارعا زاڭ اياسىندا شارا قولدانىلاتىن بولادى.

ەسكە سالساق, بۇعان دەيىن اقتوبە وبلىسىنداعى شاحتادا كەن وپىرىلىپ, جۇمىسشى قازا تاپقانى تۋرالى جازعان ەدىك.