اقتوبە وبلىسىنداعى وقۋشىلاردىڭ جاپپاي ۋلانۋى: قىتايلىق ءونىمنىڭ ساراپتاما ناتيجەسى جاريالاندى

فوتو: الەۋمەتتىك جەلىدەن

سانيتارلىق دارىگەرلەر اقتوبە وبلىسىنداعى اۋىل مەكتەبىندە وقۋشىلاردىڭ جاپپاي ۋلانۋىنا سەبەپ بولدى دەلىنگەن قىتايلىق ءونىمنىڭ ساراپتاما ناتيجەلەرىن جاريالادى. بۇل تۋرالى Stan.kz اقپارات اگەنتتىگى حابارلايدى.

بۇعان دەيىن اقتوبە وبلىسىنداعى اۋىل مەكتەبىنىڭ وقۋشىلارى قىتايلىق شايان تاياقشالارىن جەگەننەن كەيىن وزدەرىن جايسىز سەزىنىپ, جاپپاي اۋرۋحاناعا تۇسكەن ەدى. وبلىستىق سانيتارلىق-ەپيدەميولوگيالىق باقىلاۋ دەپارتامەنتى قىتايدان اكەلىنگەن تاعامنىڭ زەرتحانالىق سىناما ناتيجەلەرىن جاريالادى.

«سانيتارلىق-حيميالىق زەرتتەۋلەر ناتيجەسىندە قورعاسىن, كادمي, مىشياك انىقتالعان جوق. ميكروبيولوگيالىق زەرتتەۋلەر بويىنشا مەزوفيلدى اەروبتى جانە فاكۋلتاتيۆتى اناەروبتى ميكروورگانيزمدەر, ىشەك تاياقشاسى توبىنىڭ باكتەريالارى, سالمونەللا, زەڭ ساڭىراۋقۇلاقتارى تابىلعان جوق», – دەلىنگەن اقتوبە وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ حابارلاماسىندا.

ماماندار ءونىمنىڭ قاپتاماسىندا قۇرامى كورسەتىلمەگەنىن اتاپ ءوتتى.

«زەرتتەۋ ناتيجەلەرى بويىنشا, ءونىمنىڭ كەدەن وداعىنىڭ تەحنيكالىق رەگلامەنتتەرىنە سايكەسپەيتىنى انىقتالدى. اتاپ ايتقاندا, قاپتامادا اتاۋى, قۇرامى, ساقتاۋ مەرزىمى, ساقتاۋ شارتتارى, پايدالانۋ شەكتەۋلەرى جانە تاعامدىق قۇندىلىق كورسەتكىشتەرى تۋرالى اقپارات جوق. بەلگىلەنگەن تالاپتارعا سايكەس كەلمەيتىن ونىمدەرگە قاتىستى اقتوبە قالالىق سانيتارلىق-ەپيدەميولوگيالىق باقىلاۋ باسقارماسىنىڭ باس سانيتارلىق دارىگەرى ءۇش قاۋلى شىعاردى. وعان سايكەس ءونىمدى اينالىمنان الۋ جانە ساتىلىمنان قايتارىپ الۋ تۋرالى شەشىم قابىلداندى», – دەلىنگەن حابارلامادا.

ەسكە سالساق, بۇعان دەيىن اقتوبە وبلىسىندا ءبىر توپ وقۋشى جاپپاي ۋلانىپ, اۋرۋحاناعا تۇسكەنى تۋرالى جازعان ەدىك. وقۋشىلاردىڭ ۋلانۋىنا قاتىستى قىلمىستىق ءىس قوزعالدى.