Aqtóbe oblysyndaǵy oqýshylardyń jappaı ýlanýy: Qytaılyq ónimniń saraptama nátıjesi jarııalandy

Foto: Áleýmettik jeliden

Sanıtarlyq dárigerler Aqtóbe oblysyndaǵy aýyl mektebinde oqýshylardyń jappaı ýlanýyna sebep boldy delingen qytaılyq ónimniń saraptama nátıjelerin jarııalady. Bul týraly Stan.kz aqparat agenttigi habarlaıdy.

Buǵan deıin Aqtóbe oblysyndaǵy aýyl mektebiniń oqýshylary qytaılyq shaıan taıaqshalaryn jegennen keıin ózderin jaısyz sezinip, jappaı aýrýhanaǵa túsken edi. Oblystyq sanıtarlyq-epıdemıologııalyq baqylaý departamenti Qytaıdan ákelingen taǵamnyń zerthanalyq synama nátıjelerin jarııalady.

«Sanıtarlyq-hımııalyq zertteýler nátıjesinde qorǵasyn, kadmıı, myshıak anyqtalǵan joq. Mıkrobıologııalyq zertteýler boıynsha mezofıldi aerobty jáne fakýltatıvti anaerobty mıkroorganızmder, ishek taıaqshasy tobynyń bakterııalary, salmonella, zeń sańyraýqulaqtary tabylǵan joq», – delingen Aqtóbe oblysynyń sanıtarlyq-epıdemıologııalyq baqylaý departamentiniń habarlamasynda.

Mamandar ónimniń qaptamasynda quramy kórsetilmegenin atap ótti.

«Zertteý nátıjeleri boıynsha, ónimniń Keden odaǵynyń tehnıkalyq reglamentterine sáıkespeıtini anyqtaldy. Atap aıtqanda, qaptamada ataýy, quramy, saqtaý merzimi, saqtaý sharttary, paıdalaný shekteýleri jáne taǵamdyq qundylyq kórsetkishteri týraly aqparat joq. Belgilengen talaptarǵa sáıkes kelmeıtin ónimderge qatysty Aqtóbe qalalyq sanıtarlyq-epıdemıologııalyq baqylaý basqarmasynyń bas sanıtarlyq dárigeri úsh qaýly shyǵardy. Oǵan sáıkes ónimdi aınalymnan alý jáne satylymnan qaıtaryp alý týraly sheshim qabyldandy», – delingen habarlamada.

Eske salsaq, buǵan deıin Aqtóbe oblysynda bir top oqýshy jappaı ýlanyp, aýrýhanaǵa túskeni týraly jazǵan edik. Oqýshylardyń ýlanýyna qatysty qylmystyq is qozǵaldy.