اقتوبەدە 92 جاستاعى اجەي ءتورت بالاسىنان اليمەنت ءوندىرىپ الدى

فوتو: depositphotos.com

اقتوبەدە 92 جاستاعى اجەي ءتورت بالاسىنان اليمەنت ءوندىرىپ الدى, – دەپ حابارلايدى Massaget.kz تىلشىسى.

اقتوبە قالالىق سوتىندا تالاپ قويۋشى د.-نىڭ 9 بالاسىن ءوزىنىڭ اسىراۋىنا اليمەنت ءوندىرىپ الۋ تۋرالى تالاپ-ارىزى بويىنشا ازاماتتىق ءىس قارالدى.

تالاپ قويۋشى سوتقا 8 جاۋاپكەر-بالالارىنان اليمەنت ءوندىرىپ الۋ تۋرالى تالاپ-ارىزبەن جۇگىنىپ, ارىزىن نەگىزدەي, ول باتىر انا جانە 92 جاستا ەكەنىن ايتىپ, جاسىنا بايلانىستى كوپتەگەن سوزىلمالى اۋرۋلاردان زارداپ شەگەتىنىن مالىمدەدى.

تالاپ قويۋشى اجەي د. ز. اتتى قىزىنىڭ قامقورلىعىندا بولعان. اجەي ءوزىنىڭ تالاپ-ارىزىندا كىشى قىزى ز.-مەن قازىرگى ۋاقىتتا بىرگە تۇراتىنىن جانە ماتەريالدىق جاعىنان كومەكتەسەتىنىن ءتۇسىندىرىپ, وسىعان بايلانىستى سوتتان تەك 8 بالالارىنان اليمەنت ءوندىرىپ الۋدى سۇرادى.

ءىستى قاراۋ بارىسىندا جاۋاپكەرلەر سوتقا انالارىنا تەڭ دارەجە كومەك بەرەتىندەرى تۋرالى شىنايى جانە جەتكىلىكتى دالەلدەمەلەر ۇسىنىلمادى.

ءوز كەزەگىندە قىزى ز. ءۇشىنشى تۇلعا رەتىندە اناسىنا قامقور كورسەتىپ جۇرگەندىگى تۋرالى فاكتىنى دالەلدەپ, بۇل دالەلدەمەلەر ازاماتتىق ءىس ماتەريالدارىنا بەينەجازباسى بار قوسا بەرىلگەن ديسكىمەن راستالدى.

ءىستى قاراۋ بارىسىندا تالاپ قويۋشى بالالارى وعان كەلمەيتىندىگىن, سونداي-اق ولاردى 5-6 جىل كورمەگەنىن كورسەتىپ, بۇل دا تالاپ-ارىزدىڭ دۇرىستىعىن راستايدى.

جاۋاپكەرلەردىڭ, تالاپ قويۋشىنىڭ كىشى قىزى ز. ولاردى اناسىمەن كەزدەسۋ ءۇشىن ۇيگە كىرگىزبەيدى دەگەنىن سوت ەسكەرمەدى, سەبەبى ءوز دالەلىن تاپقان جوق. سونىمەن بىرگە سوت مۇنى مىندەتتەرىنەن جالتارۋدىڭ ءبىر ءادىسى رەتىندە قاراستىردى.

سوت تالاپ قويۋشىنىڭ بالالارىنان اليمەنت الۋعا قۇقىعى بار ەكەنىن انىقتاپ, الايدا ولاردىڭ تورتەۋى زەينەتكەرلىك جاسقا تولۋلارىنا بايلانىستى اليمەنت وندىرۋگە جاتپايتىنىن ەسكەردى. كودەكستىڭ 145-بابى 3 جانە 4-تارماقتارىن ەسكەرە وتىرىپ, تالاپ كويۋشىنىڭ اسىراۋىنا, ءىستى قاراۋ كەزىندە قولدانىلىپ جۇرگەن ايلىق ەسەپتىك كورسەتكىشكە ساي, اليمەنتتى 4 جاۋاپكەردەن 7 ەسەلەنگەن مولشەردە ءوندىردى. سوت جاۋاپكەرلەردىڭ اسىراۋىنداعى مۇگەدەك بالالارى مەن كامەلەتكە تولماعان بالالارىنىڭ بولۋىن دا نازارعا الدى.

سوت شەشىمىمەن تالاپ-ارىز ءىشىنارا قاناعاتتاندىرىلىپ, 4 جاۋاپكەردەن اناسىنىڭ پايداسىنا ونى اسىراۋعا ارقايسىسىنان 7 اەك-تەن اليمەنت ءوندىردى. سوت شەشىمى زاڭدى كۇشىنە ەنگەن جوق.