اقتوبەدە ءبىر كۇندە 350 ستۋدەنتتى وقۋدان شىعارىپ جىبەرگەن

كتك اقپاراتىنشا 100 شاقتىسىنا «وقۋ اقىسىن تولەمەدىڭ» دەسە, قالعانىن ساباققا كەلمەگەنى ءۇشىن جازالاپتى. ەندى ستۋدەنتتەر مەن ونىڭ اتا-انالارى وقۋ جىلىنىڭ اياقتالۋىنا ساناۋلى اي قالعاندا نە ىستەرىن بىلمەي وتىر.

“ەسكەرتۋسىز وقۋدان شىعارىپ جىبەردى. ءبىز ونى ءبىر اپتا بۇرىن ەستىدىك. ءبىر جەتى بۇرىن كەلگەنمىن, نەگىزى. انە كەل, مىنە كەل دەپ, سوزبالاڭداپ ءبىر جەتىگە سوزدى. وسى جىلدى اياقتاۋعا مۇمكىندىك بەرسىن. وبال عوي, قانشاما اتا-انا, قانشاما وقۋشى. ارى قاراي وقۋدى تالاپ ەتپەيمىن, بيىلعى وقۋ جىلىن اياقتاۋعا مۇمكىندىك بەرسىن” – دەيدى ستۋدەنت دينارا بەكمۋرزينا.

ەكى مىڭنان اسا ستۋدەنتى بار قازاق-ورىس حالىقارالىق ۋنيۆەرسيتەتىندە كۇندە شۋ. ءبىر ەمەس, ون ەمەس, جۇزدەگەن ستۋدەنتتى جاپپاي وقۋدان شىعارىپ نەگە جىبەرگەنىن ءتۇسىندىرىپ ايتىپ بەرەتىن جان جوق. ساندالعان اتا-انالار مەن ستۋدەنتتەر سەسسيانى اياقتاۋعا مۇمكىندك بەرۋدى تالاپ ەتىپ وتىر. ءارى قاراي كوبىنىڭ وسىندا وقىعىسى دا كەلمەيدى ەكەن. رەكتور بۇيرىعىندا 91 ستۋدەنتتىڭ وقۋ اقىسىن تولەمەگەنى ايتىلعان. ال قالعان 259 ستۋدەنت ساباققا ءجوندى قاتىسپادى دەلىنگەن. وسى ماسەلەمەن وڭىردەگى اكىمدىك پەن مينيسترلىك تە اينالىسىپ جاتىر. جينالعان اتا-انالار جانە ستۋدەنتتەرمەن كەزدەسۋگە وبلىس اكىمىنىڭ ورىنباسارى كەلدى. ەڭ قىزىعى, بۇيرىق شىعارعان رەكتوردىڭ ءوزى جوق. ول ءبارىن شەتەلدەن باقىلايدى ەكەن. ونىمەن ۋنيۆەرسيتەت وكىلدەرى دە ءجوندى بايلانىسقا شىعا الماي وتىر.

“قاشىقتان دەگەندە, مىندەتتى تۇردە ۋنيۆەرسيتەتپەن بايلانىستا بولۋ كەرەك, كەلىپ, كورىنۋى كەرەك. ياعني ستۋدەنتتەر ۋنيۆەرسيتەتپەن ەش بايلانىستا بولماعان. اقپاننان باستاپ وسى ۋاقىتقا دەيىن تەكسەرۋدى رەكتور جۇرگىزدى. سونىڭ ناتيجەسىندە شىققان. ءبىزدىڭ قولىمىزداعى زات ەمەس. رەكتوردىڭ بۇيرىعىمەن شىعارىلىپ وتىر.- دەيدى قازاق-ورىس حالىقارالىق ۋنيۆەرسيتەتىنىڭ ءبولىم باسشىسى اقنۇر قادىربەك.

شاراسىز كۇيدەگى ستۋدەنتتەر ەندى وقۋ ورنىنىڭ رەكتورىنىن جاۋاپ كۇتپەك.