Aqtóbede bir kúnde 350 stýdentti oqýdan shyǵaryp jibergen

KTK aqparatynsha 100 shaqtysyna «oqý aqysyn tólemediń» dese, qalǵanyn sabaqqa kelmegeni úshin jazalapty. Endi stýdentter men onyń ata-analary oqý jylynyń aıaqtalýyna sanaýly aı qalǵanda ne isterin bilmeı otyr.

“Eskertýsiz oqýdan shyǵaryp jiberdi. Biz ony bir apta buryn estidik. Bir jeti buryn kelgenmin, negizi. Áne kel, mine kel dep, sozbalańdap bir jetige sozdy. Osy jyldy aıaqtaýǵa múmkindik bersin. Obal ǵoı, qanshama ata-ana, qanshama oqýshy. Ary qaraı oqýdy talap etpeımin, bıylǵy oqý jylyn aıaqtaýǵa múmkindik bersin” – deıdi stýdent Dınara Bekmýrzına.

Eki myńnan asa stýdenti bar Qazaq-orys halyqaralyq ýnıversıtetinde kúnde shý. Bir emes, on emes, júzdegen stýdentti jappaı oqýdan shyǵaryp nege jibergenin túsindirip aıtyp beretin jan joq. Sandalǵan ata-analar men stýdentter sessııany aıaqtaýǵa múmkindk berýdi talap etip otyr. Ári qaraı kóbiniń osynda oqyǵysy da kelmeıdi eken. Rektor buıryǵynda 91 stýdenttiń oqý aqysyn tólemegeni aıtylǵan. Al qalǵan 259 stýdent sabaqqa jóndi qatyspady delingen. Osy máselemen óńirdegi ákimdik pen mınıstrlik te aınalysyp jatyr. Jınalǵan ata-analar jáne stýdenttermen kezdesýge oblys ákiminiń orynbasary keldi. Eń qyzyǵy, buıryq shyǵarǵan rektordyń ózi joq. Ol bárin shetelden baqylaıdy eken. Onymen ýnıversıtet ókilderi de jóndi baılanysqa shyǵa almaı otyr.

“Qashyqtan degende, mindetti túrde ýnıversıtetpen baılanysta bolý kerek, kelip, kórinýi kerek. Iaǵnı stýdentter ýnıversıtetpen esh baılanysta bolmaǵan. Aqpannan bastap osy ýaqytqa deıin tekserýdi rektor júrgizdi. Sonyń nátıjesinde shyqqan. Bizdiń qolymyzdaǵy zat emes. Rektordyń buıryǵymen shyǵarylyp otyr.- deıdi Qazaq-orys halyqaralyq ýnıversıtetiniń bólim basshysy Aqnur Qadyrbek.

Sharasyz kúıdegi stýdentter endi oqý ornynyń rektorynyn jaýap kútpek.