اقتوبەدە دارىگەردىڭ قازاسىنا قاتىستى سوت باستالدى: مارقۇمنىڭ اكەسى سوتتىڭ ءادىل ءوتۋىن تالاپ ەتىپ وتىر

فوتو: KAZ.NUR.KZ

اقتوبەدە ءوز پاتەرىندە كىسى قولىنان قازا بولعان جاس دارىگەردىڭ ولىمىنە قاتىستى سوت باستالدى. كۇدىكتىگە قىلمىستىق كودەكستىڭ ءتورت بىردەي بابى بويىنشا ايىپ تاعىلدى, دەپ حابارلايدى KAZ.NUR.KZ ءتىلشىسى.

بۇگىن اقتوبە وبلىستىق قىلمىستىق ىستەر جونىندەگى مامانداندارىلعان اۋدانارالىق سوتىندا جاس دارىگەردىڭ ولىمىنە قاتىستى جابىق سوت باستالدى. كۇدىكتىگە ءتورت بىردەي باپپەن ايىپ تاعىلعان: قىلمىستىق كودەكستىڭ 149-بابىنىڭ 2 تارماعى – «تۇرعىنجايعا قولسۇعىلماۋشىلىقتى بۇزۋ», 120-باپتىڭ 2-تارماعىنىڭ 2-بولىگى – «زورلاۋ», 99-باپتىڭ 2-تارماعى – «ادام ءولتىرۋ» جانە 380-باپتىڭ 1-تارماعى – «بيلىك وكىلىنە قاتىستى قورقىتۋ نەمەسە كۇش كورسەتۋ ارەكەتتەرى». سوت تالقىلاۋىنا تەك پروتسەسكە قاتىسۋشىلار عانا كىردى. ەرتەمەن سوت عيماراتىنىڭ الدىنا كەلگەن جابىرلەنۋشىنىڭ اكەسى جانايقايىن جەتكىزدى. «ماعان سوتتىڭ ءادىل شەشىم شىعارعانى كەرەك. ماكسيمالدى تۇردە جازا تاعايىنداسا دەيمىز. قولىمەن ىستەگەندى موينىمەن كوتەرۋى كەرەك ول بالا. بىزگە وڭاي بولعان جوق, جالعىز قىزىمىزدان ايىرىلدىق. سوت اشىق بولسىن دەپ ايتامىن, بىراق جابىق بولادى دەپ جاتىر. قورعاۋشىم بار. ءوزىم ايتارىم, سوت ءادىل ءوتىپ, ءادىل شەشىم شىعارسا دەيمىن. قالاي بولعانى شەت جاعاسى بەلگىلى. سوت قانشا ۋاقىتقا سوزىلاتىنىن بىلمەيمىن. قىزىمدى ايۋاندىقپەن ولتىرگەن. سوعىستا دا مۇنداي جاعداي بولماعان شىعار. ماتەريالدى كورسەتتى, تانىستىم. ونداي حايۋاندىققا قالاي بارعانىن بىلمەيمىن. قولىمدا بولسا اتۋ جازاسىن بەرەر ەدىم. ماعان قاراسىپ, دەنساۋلىعىما قاراسىپ وتىرعان. اقتوبەدە 10 جىل وقىدى, گرانتقا ءتۇستى, ءوز بىلىمىمەن جۇمىسقا تۇردى. ۇجىمدا بەدەلى بار ەدى. قايتەيىن»,- دەدى مارقۇمنىڭ اكەسى قالدىباي تۇماروۆ. ءمولدىر توماروۆا – قىزىلوردا وبلىسىنىڭ تۋماسى. اكەسى قىزىنىڭ ىسىنە قاتىسۋ ءۇشىن قىزىلوردادان ارنايى كەلگەن. ءۇشىنشى توپ مۇگەدەكتىگى بار.

ەcكە سالساق, قايعىلى وقيعا بيىل 22 ساۋىردە بولعان. اقتوبە مەديتسينا ورتالىعىنىڭ ەندوكرينولوگ دارىگەرى ءمولدىر توماروۆانىڭ كورشىلەرى قاندى وقيعا تۋرالى كورگەن-بىلگەنىن ايتىپ بەردى. كەيىن «جالعىز قىزىمدى اياۋسىز ءولتىردى» دەپ سۇقبات بەرگەن مارقۇمنىڭ اكەسى ءىستىڭ ءادىل تەرگەلۋىن سۇرادى. سوت پروتسەسى جابىق وتەدى. وبلىستىق سوتتىڭ ءباسپاسوز قىزمەتىنىڭ مالىمەتىنشە, قىلمىستىق ىستە زورلاۋ بابى بويىنشا ءمان-جايلار ايتىلادى.