اقتوبەدە ەكى بالاسىن ءولتىردى دەپ ايىپتالعان بالا كۇتىمى دەمالىسىنداعى مۇعالىمنىڭ سوتى باستالدى

فوتو: وردا.كز

اقتوبەدە جاس كەلىنشەك 11 ايلىق جانە 3 جاستاعى بالالارىن تۇنشىقتىرىپ ءولتىردى دەگەن كۇدىككە ءىلىندى. ايەل قايعىلى وقيعاعا دەيىن دە بالالارىن بىرنەشە رەت ولتىرۋگە وقتالعان. قازىر 29 جاستاعى كەلىنشەك تالعارداعى پسيحيكالىق ەمدەۋ ورتالىعىندا جاتىر, دەپ حابارلايدى qandastar.kz   Orda.kz-كە سىلتەمە جاساپ.

بۇگىن اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قوس ءبۇلدىرشىننىڭ ولىمىنە قاتىستى ءىس باستالدى. سوتتا الدىن الا تىڭداۋ ءوتتى.

ءىس بويىنشا 29 جاستاعى كۇدىكتى ءوزىنىڭ قاساقانا ءىس-ارەكەتىمەن قر قىلمىستىق كودەكستىڭ 99-بابى 3-بولىگىندە («ادام ءولتىرۋ») كورسەتىلگەن قىلمىستى جاسادى دەپ ايىپتالدى.

قايعىلى وقيعا 2025 جىلدىڭ 23 ناۋرىز ايىندا بولدى. 11 ايلىق قىزىن جانە 3 جاستاعى ۇلىن تۇنشىقتىرىپ ولتىرگەنىن ايەلدىڭ ءوزى ايتىپ بەرگەن. كۇدىكتى فاكت بولعانعا دەيىن اتىراۋ وبلىسىنىڭ ساعىز اۋىلىندا تۇرعان.

سوتقا جابىرلەنۋشى رەتىندە ايەلدىڭ كۇيەۋى, بالالاردىڭ اكەسى كەلدى. ايتۋىنشا, 4 جىل بىرگە تۇرعان, قازىر دە زاڭدى نەكەدە.

«بۇعان دەيىن دە وسىنداي وقيعا بولدى. ونى ايەلىمنىڭ ءوزى ايتتى. 11 ناۋرىز كۇنى ساعات كەشكى 17:00 شاماسىندا ۇيىقتاپ جاتتىم. ول ماعان «قىزدى تۇنشىقتىرىپ تاستادىم» دەدى. بالالار ويناپ ءجۇردى. سەنگەن جوقپىن, ءمان بەرمەدىم. كەيىن سىرتقا شىعىپ كەتىپ, ويلاندىم, قورىقتىم, قايتىپ كەلدىم. قىزدىڭ ءبىر جاق بەتىندە كىشكەنە داقتار قاپتاپ كەتكەن. ايەلىم: «تاياۋدا ولەدى» دەدى. كەيىن اتا-اناسىنا حابار بەردىم. ارەكەت بولسىن دەپ پوليتسيا قىزمەتكەرلەرىن شاقىردىم. 10 كۇن ارالىعىندا ايەلىمدى اكەسى اقتوبەگە ءوز ۇيىنە الىپ كەتتى. بالالاردى جىبەرگەندە قورقىنىش بولمادى, سەندىم. وقيعا بولعان كەزدە ءىنىسى مەن كەلىنى ۇيدە, باسقا بولمەدە بولعان. مەن بولمادىم ول جەردە. تەلەفون ارقىلى ەستىدىم. 23 ناۋرىز كۇنى تۇستە بولعان. اكەسىنە حابارلاسىپ, ءوزى ايتقان. مەن ءوزىم ۆاحتادا جۇمىس ىستەيمىن. وعان ەكىنشى دارەجەلى پسيحوز دياگنوزى قويىلعان. ول ەكى بالانىڭ كۇتىمىمەن ۇيدە وتىردى. مۇعالىم بولىپ جۇمىس ىستەگەن», — دەدى جولداسى جەڭىسبەك ءادىلحانوۆ.

سوتتالۋشى 1996 جىلى بايعانين اۋدانىندا تۋعان. ءبىلىمى جوعارى. سوڭعى جىلدارى بالا كۇتىمىمەن ۇيدە وتىرعان. وعان دەيىن اتىراۋ وبلىسىنداعى مەكتەپتەردىڭ بىرىندە باستاۋىش سىنىپتارعا ساباق بەرگەن. مۇعالىم رەتىندە قىزمەت اتقارعان.

مەملەكەتتىك ايىپتالۋشى كۇدىكتىگە قاتىستى ايىپتاۋ ءمانىن باياندادى.

«2025 جىلدىڭ 13 ناۋرىزى كۇنى د.ب. اتىراۋ وبلىسى قىزىلقوعا اۋدانى ساعىز اۋىلىندا تۇراتىن قىزىنىڭ جۇيكە جۇيەسىنىڭ بۇزىلىپ جۇرگەنىن بىلەدى. قىزىن وزىمەن بىرگە مۇعالجار اۋدانى قاندىاعاش قالاسىنا اكەلەدى. 23 ناۋرىز كۇنى ساعات 13:00 شاماسىندا 2022 جىلى قاڭتاردا تۋعان ۇلىن, 9 ءساۋىر 2024 جىلى تۋعان قىزىن ءوز قولىمەن تۇنشىقتىرىپ, ياعني 2 نەمەسە ودان دا كوپ ادامعا, ونىڭ ۇستىنە دارمەنسىز جاس بالالارىن قاساقانا ولتىرگەن. سابيلەردىڭ مايىتىنە تاعايىندالعان سوت-مەديتسينالىق قورىتىندىسىنا سايكەس ونىڭ ءولىمى مەحانيكالىق اسفەكسيا. تىنىس الۋ جولدارىنىڭ, مۇرنىنىڭ, اۋىزىنىڭ جابىلۋى, ياعني جۇمساق زاتپەن باسۋدان بولعان. تىنىس الۋ جولدارىنا قان قۇيىلعان», — دەدى پروكۋرور ەلدار ابيەۆ.

سۋديا كۇدىكتىنىڭ پسيحيكالىق اۋرۋى جانە ونىڭ وسىنداي جاعدايعا جەتكەنى تۋرالى باستى سوت تالقىلاۋىندا انىقتالاتىنىن ايتتى. ياعني ايىپتالۋشىنىڭ كىناسىن, ەسى دۇرىس, نە دۇرىس ەمەس ەكەنىنە قاتىستى سوتتا شەشىمى قابىلدانادى.

«بۇل كىسى قازىر ءوزىنىڭ دەنساۋلىق جاعدايىنا بايلانىستى ارەكەتكە قابىلەتسىز دەپ تانىلعان جوق. دەگەنمەن سوت-مەديتسينالىق زەرتتەۋلەر, ساراپتاما نەگىزىندە ارەكەتكە قابىلەتسىز دەپ تانىلىپ تۇر», — دەدى سۋديا نۇرلان باقتىعاليەۆ.

باستى سوت تالقىلاۋى 10 ماۋسىمعا تاعايىندالدى.