اقتوبەدە ءيتتى تەۋىپ, اياۋسىز پىشاقتاعان بالا بۇعان دەيىن دە مەكتەپىشىلىك ەسەپتە تۇرعان

فوتو: سكرين

اقتوبەدە ءيتتى جىپكە بايلاپ, تەۋىپ, اياۋسىز پىشاقتاپ ولتىرگەن بالانىڭ ءىسىن كوميسسيا قارادى. الداعى ۋاقىتتا بالامەن پسيحولوگتار جۇمىس ىستەيدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

بالانىڭ ءوزى قازىر تەرگەۋدە ەكەن. ال وبلىستىق ءبىلىم باسقارماسى بالانى تاربيەلەۋ ءۇشىن بىرنەشە امالىن قاراستىرىپ جاتىر. ءمالىم بولعانداي بالا بۇعان دەيىن دە مەكتەپىشىلىك ەسەپتە تۇرعان.

“تەرگەۋ امالدارى اياقتالعان سوڭ, كامەلەتكە تولماعاندار ءىسى جونىندەگى كوميسسيا وتىرىسىنا شىعارىلادى. پسيحولوگتار ساۋىقتىرۋ جۇمىسىنىڭ جوسپارىن دايىنداپ قويدى. جوسپار اياسىندا بالاعا پسيحولوگيالىق قولداۋ كورسەتۋ, اگرەسسيۆتى مىنەز-قۇلقىن تۇزەتۋ جانە الەۋمەتتىك بەيىمدەلۋىنە كومەكتەسۋ شارالارى قاراستىرىلعان. سونىمەن قاتار, اتا-اناسىمەن بىرلەسكەن كەڭەستەر وتكىزىپ, وتباسى جاعدايىن جاقسارتۋعا باعىتتالعان ءىس-شارالار ۇيىمداستىرۋ جوسپارلانۋدا. مەكتەپ اكىمشىلىگى دە وقۋشىنىڭ ءبىلىم الۋىنا جانە ءتارتىبىن قاداعالاۋعا ەرەكشە نازار اۋداراتىن بولادى. ەكىنشى بالا دا نازاردا بولادى. نەمقۇرايلى بولماس ءۇشىن تاربيەلىك, پسيحولوگيالىق جۇمىستار جۇرگىزىلەدى”, — دەدى اقتوبە وبلىستىق ءبىلىم باسقارماسىنىڭ باسشىسى جايىق سۇلتان.

ەسكە سالايىق, اقتوبەدەگى اۋىلداردىڭ بىرىندە وقۋشى موينىنا ءجىپ بايلانعان ءيتتى سۇيرەپ, قاتىگەزدىكپەن پىشاقتاپ تاستاعانى تۋرالى حابارلاعان ەدىك.