Aqtóbede ıtti teýip, aıaýsyz pyshaqtaǵan bala buǵan deıin de mektepishilik esepte turǵan

Foto: skrın

Aqtóbede ıtti jipke baılap, teýip, aıaýsyz pyshaqtap óltirgen balanyń isin komıssııa qarady. Aldaǵy ýaqytta balamen psıhologtar jumys isteıdi. Bul týraly qandastar.kz Stan.kz aqparat agenttigine silteme jasap habarlaıdy.

Balanyń ózi qazir tergeýde eken. Al oblystyq bilim basqarmasy balany tárbıeleý úshin birneshe amalyn qarastyryp jatyr. Málim bolǵandaı bala buǵan deıin de mektepishilik esepte turǵan.

“Tergeý amaldary aıaqtalǵan soń, Kámeletke tolmaǵandar isi jónindegi komıssııa otyrysyna shyǵarylady. Psıhologtar saýyqtyrý jumysynyń josparyn daıyndap qoıdy. Jospar aıasynda balaǵa psıhologııalyq qoldaý kórsetý, agressıvti minez-qulqyn túzetý jáne áleýmettik beıimdelýine kómektesý sharalary qarastyrylǵan. Sonymen qatar, ata-anasymen birlesken keńester ótkizip, otbasy jaǵdaıyn jaqsartýǵa baǵyttalǵan is-sharalar uıymdastyrý josparlanýda. Mektep ákimshiligi de oqýshynyń bilim alýyna jáne tártibin qadaǵalaýǵa erekshe nazar aýdaratyn bolady. Ekinshi bala da nazarda bolady. Nemquraıly bolmas úshin tárbıelik, psıhologııalyq jumystar júrgiziledi”, — dedi Aqtóbe oblystyq bilim basqarmasynyń basshysy Jaıyq Sultan.

Eske salaıyq, Aqtóbedegi aýyldardyń birinde oqýshy moınyna jip baılanǵan ıtti súırep, qatygezdikpen pyshaqtap tastaǵany týraly habarlaǵan edik.