اقتوبەدە قازاقشا كۇرەستەن جارىس كەزىندە 15 جاستاعى ءجاسوسپىرىم كوز جۇمدى

فوتو: تەنگرينيۋس

اقتوبەدە قازاقشا كۇرەستەن جارىس كەزىندە 15 جاستاعى ءجاسوسپىرىم كوز جۇمدى, دەپ حابارلايدى  qandastar.kz

وقيعا 2025 جىلدىڭ اقپانىندا بولسا دا, مارقۇمنىڭ تۋىستارى قايعىلى وقيعا تۋرالى ەندى عانا ايتۋعا بەل بايلاعان. ءجاسوسپىرىمنىڭ اتا-اناسىنا استاناداعى كۇرەس جارىسى كەزىندە بولعان وقيعا اسەر ەتىپتى.

اقتوبەدەگى سايىسقا 15 جاستاعى راحىمجان ەلەپبەرگەنوۆ ءوز باپكەرىمەن بىرگە رودنيكوۆكا اۋىلىنان كەلگەن. سپاررينگ كەزىندە قارسىلاسى ءجاسوسىپىرىمدى كوتەرىپ كىلەمگە لاقتىرعان. ءجاسوسپىرىم جاعدايى ناشارلاپ, باسىن ۇستاپ, كىلەمدە جاتىپ قالعان.

“ۆيدەودا ۇلىمنىڭ ۇزاق ۋاقىت قينالىپ جاتقانى كورىنەدى. زال تولىق بولسا دا, ەشكىم نازار اۋدارماعان. ءبىراز ۋاقىتتان كەيىن ءبىر باپكەر, كەيىن باسقالارى كەلەدى. بىراق ول كەزدە راحىمجان ەسىنەن تانىپ قالعان”, – دەيدى ءجاسوسپىرىمنىڭ اكەسى نۇرلىبەك مۇقانعاليەۆ.

ءجاسوسپىرىمدى اۋرۋحاناعا الىپ كەلگەندە دارىگەرلەر دەرەۋ كوماعا تۇسكەنىن انىقتاپ, ميىنا قان قۇيىلعانىن حابارلاعان. تۋىستارىنىڭ ايتۋىنشا, وقيعادان 28 ساعات وتكەن سوڭ عانا باس سۇيەگىنە وتا جاسالعان. وتادان كەيىن ول 42 كۇن بويى ەس-ءتۇسسىز جاتىپتى.

2025 جىلدىڭ 5 ساۋىرىندە جاسوسپىرىم ومىردەن ءوتتى.

كەيىنىرەك اتا-انا ۇلدارى جاراقات العان كۇنى جيىندا دارىگەرلەر بولماعانىن, سپورتشىلاردىڭ قاسىندا العاشقى مەديتسينالىق كومەك كورسەتە الاتىن ادام بولماعانىن بىلگەن.

“جيىن قازاقشا كۇرەس فەدەراتسياسىنىڭ باستاماسىمەن وتكەن. نىسانعا مەديتسينا قىزمەتكەرى بەكىتىلگەن, بىراق ءدال سول كۇنى ول دەنساۋلىعىنا بايلانىستى دەمالىستا بولعان”, – دەيدى اقتوبە وبلىسى دەنە شىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ.

راحىمجاننىڭ اتا-اناسى كومەك ۋاقىتىندا كورسەتىلسە, قايعىلى وقيعانىڭ الدىن الۋعا بولار ەدى دەگەن پىكىردە.

پوليتسيا سپورتتىق جيىن كەزىندە بولعان وقيعا بويىنشا “قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ, جۇمىستاردى ورىنداۋ نەمەسە قىزمەت كورسەتۋ” بابى بويىنشا قىلمىستىق ءىس قوزعاعان.

Skifnews.kz جازعانداي, كەيىنىرەك تەرگەۋشىلەر ءىستى جاۋىپ تاستاعان. ۇلىن جوعالتقان اتا-انانىڭ تەرگەۋمەن اينالىسۋعا شاماسى بولماپتى. كەيىنىرەك ولارعا تەك ءجاسوسپىرىمدى جيىنعا اپارعان باپكەردىڭ جۇمىستان بوساتىلعانى حابارلانعان.

“بارلىق تەرگەۋ شارالارى تولىق جۇرگىزىلدى, سونىڭ ىشىندە بەينەباقىلاۋ كامەرالارىنىڭ جازبالارى قارالدى, كۋاگەرلەر مەن كورگەن ادامداردان سۇراۋ الىندى. قىلمىستىق قۇقىق بۇزۋشىلىق قۇرامى بولماعاندىقتان, قاداعالاۋشى ورگاننىڭ كەلىسىمىمەن قىلمىستىق ءىس توقتاتىلدى”, – دەلىنگەن اقتوبە وبلىستىق پوليتسيا دەپارتامەنتىنىڭ حابارلاماسىندا.